Markmið meistaranáms í íslenskum bókmenntum er að veita nemendum vísindalega þjálfun og búa þá undir framhaldsnám og störf af ýmsu tagi, s.s. framhaldsskólakennslu, margvísleg fræðistörf og doktorsnám.
Umsóknarfrestur fyrir meistara- og doktorsnám á Hugvísindasviði er til 15. apríl fyrir innritun á haustmisseri, en erlendra umsækjenda utan EES-svæðisins til 1. febrúar. Umsóknarfrestur á vormisseri er til 15. október. Heimilt er að taka við umsóknum um doktorsnám á öðrum tímum ef sérstaklega stendur á. Umsóknum skal skilað til Nemendaskrár Háskóla Íslands á sérstöku rafrænu eyðublaði sem aðgengilegt er á vef skólans.
Inntökuskilyrði
Aðgang að M.A.-námi í íslenskum bókmenntum veitir B.A.-próf með fyrstu einkunn (7,25) í íslensku eða almennri bókmenntafræði sem aðalgrein.
Nemendur með B.A.-próf í íslensku sem öðru máli og erlendum tungumálum geta fengið aðgang að M.A.-námi ef þeir ljúka kjarnanámskeiðum í íslenskum bókmenntum á B.A.-stigi – samtals 40 e.
Nemendur með B.A.-próf í öðrum greinum hug- og félagsvísinda geta einnig fengið aðgang að M.A.-námi ef þeir ljúka öllum kjarnanámskeiðum í íslenskum bókmenntum á B.A.-stigi – samtals 40 e.
Nemendur með B.Ed.-próf geta fengið aðgang að M.A.-námi ef þeir ljúka 30-40 e í íslenskum bókmenntum á B.A.-stigi. Einingafjöldi og samsetning þess náms fer eftir innihaldi B.Ed.-prófsins.
Nemendur með önnur háskólapróf, a.m.k. 180 e, geta fengið aðgang að M.A.-námi ef þeir ljúka öllum kjarnanámskeiðum í íslenskum bókmenntum á B.A.-stigi og a.m.k. tveimur valnámskeiðum í bókmenntum að auki – samtals 60 e.
Í öllum tilvikum er fyrsta einkunn á B.A.-/B.Ed.-prófi skilyrði fyrir inngöngu.
Námsskipan
Til meistaraprófs er krafist 120 e að loknu B.A.-prófi (180 e) og skulu þar af minnst 60 e vera úr námskeiðum á meistarastigi í íslenskum bókmenntum. Heimilt er að velja námskeið allt að 30 e úr námskeiðum í skyldum greinum í samráði við greinarformann, svo sem námskeið úr almennri bókmenntafræði, íslenskri málfræði, sagnfræði, heimspeki, erlendum tungumálum o.s.frv.
Meistaraprófsritgerð í íslenskum bókmenntum vegur yfirleitt 30 e. Ritgerðarefni velur stúdent í samráði við kennara á því sérsviði sem hann hefur valið. Markmið meistaraprófsritgerðar er að veita þjálfun í vísindalegum vinnubrögðum og til hennar skal gera meiri kröfur en til B.A.-ritgerðar um fræðilega framsetningu, frumleg efnistök og sjálfstætt framlag nemandans. Hægt er að sækja um að skrifa 60 e meistaraprófsritgerð.
Kennsluhættir og námsmat
Kennslan fer fram í formi fyrirlestra, umræðna og margs kyns verkefnavinnu og ritgerðasmíði. Áhersla er lögð á virka þátttöku nemenda í kennslunni. Þar sem hér er um rannsóknanám að ræða er gert ráð fyrir verulegu frumkvæði og sjálfstæði nemenda í vali viðfangsefna, heimildaöflun, heimildatúlkun o.s.frv. Námsmat fer langoftast fram með ritgerðum og/eða fyrirlestrum.
Námsmarkmið
Að loknu námi er gert ráð fyrir að nemendur
- hafi góða þekkingu og skilning á helstu aðferðum og fræðikenningum sem beitt er við bókmenntarannsóknir, og nákvæma þekkingu og skýran skilning á völdum aðferðum og kenningum;
- hafi góða þekkingu á íslenskum miðaldabókmenntum, íslenskum bókmenntum síðari alda og íslenskum nútímabókmenntum, og víðtæka þekkingu á völdum tímabilum og/eða sviðum bókmenntanna;
- hafi yfirsýn yfir ólík sjónarmið, aðferðir og hugmyndir sem stýra rannsóknum á því sviði eða sviðum sem rannsóknir þeirra taka til;
- geti sett eigið viðfangsefni í vítt samhengi, lagt sjálfstætt mat á ágreiningsefni innan fræðanna og borið eigin niðurstöður saman við niðurstöður annarra fræðimanna;
- geti beitt þekkingu sinni og færni til að takast á við ný og áður ókunn bókmenntafræðileg úrlausnarefni;
- geti tekið þátt í fræðilegum rökræðum um bókmenntafræðileg álitamál bæði í ræðu og riti;
- séu færir um að greina frá fræðilegum niðurstöðum jafnt í áheyrn sérfræðinga og almennings;
- þekki fjölbreyttar leiðir til miðlunar á bókmenntum og bókmenntafræðilegu efni í nútíma samfélagi og séu færir um að nýta sér valdar leiðir;
- geti unnið víðtæka og vandaða rannsókn á sjálfstæðan hátt um viðfangsefni sem skiptir máli fyrir framvindu fræðilegrar umræðu;
- séu færir um að semja útdrætti og erindi fyrir fræðilegar ráðstefnur og skrifa fræðigreinar til birtingar í tímaritum;
- hafi þróað með sér sjálfstæð vinnubrögð við rannsóknir og séu undir það búnir að skrifa bækur um bókmenntaleg efni, einir eða með öðrum.
Nánari upplýsingar í kennsluskrá Háskóla Íslands.
Doktorsnám
M.A.-próf í íslenskum bókmenntum veitir rétt til inngöngu í doktorsnám í greininni. Það er fjögurra ára nám, 240 e, sem skiptist í 60 e almennt nám og 180 e doktorsritgerð.
Hægt er að hafa samband við verkefnastjóra deildar og verkefnastjóra alþjóðamála til að fá nánari upplýsingar um nám og skiptinám.