Meistaranám í annarsmálsfræðum, 120e (2 ár)
Námið verður í samvinnu tveggja deilda á Hugvísindasviði; Íslensku- og menningardeildar og Mála- og menningardeildar. Markmiðið með náminu er að bjóða nýja námsleið í meistaranámi, annarsmálsfræði. Erlendis og á Íslandi er stöðugt aukinn áhugi á þessum fræðum enda skipta þau máli hvað snertir meiri þekkingu á eðli máltileinkunar annars máls og bættar kennslu- og námsaðferðir. Þessi nýja námsleið er svar við brýnni þörf fyrir betri menntun tungumálakennara sem kenna á háskólastigi og þeirra sem kenna fullorðnum tungumál á öðrum vettvangi. Námsleiðinni er einnig ætlað að efla rannsóknir á sviði annarsmálsfræða og tví- og margtyngis.
Námið er ætlað þeim sem hyggjast vinna við rannsóknir á fræðasviðinu og sem undanfari doktorsnáms og einnig þeim sem hyggjast leggja fyrir sig kennslu í öðru eða erlendu máli fyrir fullorðna og loks þeim sem vilja dýpka og víkka þekkingu sína á kennslu tungumála fyrir fullorðna.
Nemendur fá yfirgripsmikla fræðslu um stöðu þekkingar í annarsmálsfræðum og kennslufræðum annars máls. Þeir fá þjálfun í beitingu rannsóknaraðferða og æfingu í sjálfstæðum vinnubrögðum.
Markhópurinn er nemendur sem hafa lokið BA-námi í Íslensku- og menningardeild eða Mála- og menningardeild eða samsvarandi námi, starfandi tungumálakennarar og aðrir sem hafa áhuga á tungumálakennslu fullorðinna.