Háskóli Íslands er samfélag starfsfólks og nemenda og er einn stærsti vinnustaður landsins. Háskólinn er í góðri stöðu til að hafa áhrif út í samfélagið. Umhverfisáhrif af rekstri stórrar stofnunar á borð við Háskóla Íslands eru umtalsverð. Áherslur skólans á sjálfbærni birtast hvað skýrast í innra umhverfi í byggingum hans, í skipulagi háskólasvæðisins og tengslum þess við ytra umhverfi. Einnig geta hversdagslegar ákvarðanir sem háskólaborgarar taka í sínu daglega lífi - neyslu, samgöngur, samskipti og fleira - ráðið miklu um frammistöðu skólans á sviði umhverfismála og sjálfbærni. Öll starfsemi Háskólans bergmálar út í samfélagið, bæði það góða og slæma, og því er samfélagsleg ábyrgð Háskólans stór. En hvað get ég gert? Hér að neðan má sjá hugmyndir að því hvernig hægt er að hafa áhrif og draga úr neikvæðum umhverfisáhrifum í okkar daglega starfi. Hvað get ég gert? Hvað get ég lagt að mörkum til að stuðla að sjálfbærara samfélagi? Ég get... lágmarkað úrgang Þarf ég þetta, eða er þetta kannski eitthvað sem endar fljótt í ruslinu? Þarf ég allar þessar umbúðir? Hvað er í matinn? Er kannski eitthvað að skemmast í ísskápnum? Hvað með að endurvinna? Hvernig get ég gert innkaup mín umhverfisvænni? Get ég tileinkað mér „grænni“ lífstíl? Ég get... lágmarkað skaðlegan útblástur Takmarkað orkunotkun og notað endurnýjanlega orku frekar en óendurnýjanlega Hjólað, gengið eða tekið strætó í skólann Verslað í nágrenni mínu Ég get... notað hugvitið Hugsað út fyrir hina hefðbundnu ramma og tekið umhverfismál með í ákvarðanatöku minni Stundað rannsóknir á umhverfi og sjálfbærni og miðlað af þekkingu minni Að hugsa er umhverfisvæn iðja Að segja sögur er vistvæn skemmtun Ég get stuðlað að heilbrigðri samræðu við samferðafólk um sjáfbærni og umhverfismál Ég get farið í umhverfis- og auðlindafræði Ég get... látið til mín taka Ég get verið fyrirmynd í hversdagslegum athöfnum Ég get beitt mér fyrir betri heimi Ég get tekið þátt í starfi frjálsra félagasamtaka Landvernd Náttúruverndarsamtök Íslands Samtök um bíllausan lífsstíl Landssamtök hjólreiðamanna Leiðir til að spara orku Slökkvum á tölvuskjám áður en við förum heim úr vinnu og slökkvum á tölvum um helgar og þegar við förum í lengri frí. Slökkvum öll ljós í rýmum sem eru ekki í notkun og öll ljós í lok dags. Sérstaklega er hugað að fundarherbergjum, geymslum og þar sem dagsbirtu nýtur við. Notum ekki skjáhvílur. Stillum hitann rétt á ofnum, ekki opna glugga einungis til að stjórna hita í herbergjum. Lækkum hita á ofnum þegar farið er í frí eða burtu í lengri tíma. Athugið að slökkva aldrei alveg á ofnum, það fer illa með vatnsleiðslurnar. Leiðir til að draga úr neikvæðum umhverfisáhrifum samgangna Gerum samgöngusamning og ferðumst með vistvænum hætti. Samningar eru gerðir í launadeild. Notum fjarfundarbúnað frekar en að ferðast langar leiðir á fundi. Göngum eða hjólum í vinnuna frekar en að koma keyrandi. Notum aðra vistvæna samgöngumáta eins og t.d. Strætó. Óskum eftir umhverfisvænni leigubílum. Leiðir til að draga úr neikvæðum umhverfisáhrifum úrgangs Flokkum allt sorp og nýtum „flokkunarbarina“. Notum fjölnota leirtau. Komum með okkar eigin fjölnota drykkjarmál undir kaffi, vatn og aðra drykki. Komum með nestisbox fyrir matinn í Hámu sem við viljum taka með okkur í stað þess að biðja um einnota ílát. Bendum nemendum á að drykkir í fjölnota, lokuðum málum eru leyfilegir í kennslustofum. Nýtum blöð sem falla til við prentun / ljósritun og notum sem krassblöð. Notum ímyndunaraflið við að endurnýta umbúðir, s.s. kassa, innkaupapoka og annað sem fellur til við innkaup. Leiðir til að draga úr neikvæðum umhverfisáhrifum innkaupa Spyrja sig hvort að þú þurfir raunverulega á þessum hlut að halda. Lærum að þekkja umhverfismerkingar og vottanir og hvernig stuðla megi að grænni lífsstíl, sjá nánar á vef Umhverfisstofnunar. Kaupa frekar vandaðri vöru sem hafa lengri endingartíma Spyrja birgja og verslunaraðila hvort að ekki sé hægt að fá vandaðri vörur eða umhverfisvottaðar. Þannig getum við haft áhrif á vöruúrval og vöruþróun. Endurnýtum tölvur og húsgögn ef möguleiki er á. emailfacebooklinkedintwitter
