Skip to main content
Forsíða
Forsíða
22. desember 2017

Verðlaunaður fyrir afburðaárangur í verkfræði við HÍ

Valentin Oliver Loftsson, BS-nemi í hugbúnaðarverkfræði, hefur hlotið styrk úr Minningarsjóði Þorvalds Finnbogasonar stúdents. Vigdís Finnbogadóttir, systir Þorvalds, afhenti styrkinn við hátíðlega athöfn á Litla torgi fimmtudaginn 21. desember.

Tilgangur sjóðsins er að styrkja efnilega nema í verkfræði við Háskóla Íslands til framhaldsnáms í verkfræði. Nemandi, sem er með hæstu meðaleinkunn eftir annað ár í grunnnámi, hlýtur styrkinn hverju sinni. 

Valentin Oliver Loftsson lauk stúdentsprófi frá Verzlunarskóla Íslands vorið 2014 og hóf BS-nám í hugbúnaðarverkfræði haustið 2015. Hann hlaut styrk úr Afreks- og hvatningarsjóði stúdenta Háskóla Íslands fyrir háskólaárið 2015-2016.

Minningarsjóður Þorvalds Finnbogasonar stúdents var stofnaður af foreldrum hans, Sigríði Eiríksdóttur og Finnboga Rúti Þorvaldssyni, fyrrverandi forseta verkfræðideildar Háskóla Íslands. Árlega er veitt viðurkenning úr sjóðnum til afburðanemanda í verkfræði við Háskóla Íslands en sjóðurinn var stofnaður á 21 árs afmæli Þorvalds, þann 21. desember 1952.

Valentin Oliver Loftsson, BS-nemi í hugbúnaðarverkfræði, er hér ásamt Vigdísi Finnbogadóttur, fyrrverandi forseta og systur Þorvalds Finnbogasonar, við úthlutun viðurkenningarinnar á Háskólatorgi.
Valentin verðlaunahafi ásamt fjölskyldu sinni, Vigdísi Finnbogadóttur og fjölskyldu, rektor og aðstoðarektor Háskóla Íslands og forseta Verkfræði- og náttúruvísindasviðs.