Varði doktorsritgerð um Guðmundar sögur biskups

Gunnvör S. Karlsdóttir hefur varið doktorsitgerð sína í íslenskum bókmenntum sem nefnist Guðmundar sögur biskups. Þróun og ritunarsamhengi. Doktorsvörnin fór fram í Hátíðasal Háskóla Íslands 6. október síðastliðinn og það var Gunnþórunn Guðmundsdóttir, forseti Íslensku- og menningardeildar, sem stjórnaði athöfninni. Andmælendur voru Hjalti Hugason, prófessor í kirkjusögu við Guðfræði- og trúarbragðafræðideild, og Marianne Kalinke, prófessor emeríta við Illinois-háskóla í Bandaríkjunum. Doktorsritgerðin var unnin undir leiðsögn Ásdísar Egilsdóttur, prófessor emeríta, og aðrir í doktorsnefnd voru Svanhildur Óskarsdóttir og Einar Sigurbjörnsson. (Hér má skoða myndir frá vörninni).

Um rannsóknina

Til rannsóknar voru fjórar mismunandi sögur Guðmundar Arasonar góða Hólabiskps (1161–1237) sem allar voru ritaðar á fyrri hluta 14. aldar. Frásagnarhlutar, bygging, framsetning og stíll hverrar sögu var kannaður með það fyrir augum að bera saman breytingar frá einni gerð til annarrar og rekja þróun. Að því loknu var ritunarsamhengi sagnanna skoðað með hliðsjón af bókmenntasögu ritunartímans og kirkjusögulegum forsendum. Rannsóknin er framlag til bókmenntasögu 14. aldar og er hluti af rannsóknarverkefninu Encounters with the Paranormal sem stýrt hefur verið af Ármanni Jakobssyni.

Um höfundinn

Gunnvör S. Karlsdóttir lauk BA-prófi í íslensku 1998 og MA-prófi í íslenskum bókmenntum frá Íslensku- og menningardeild Háskóla Íslands 2009. Á námstímanum hlaut hún styrk í tengslum við ofangreint rannsóknarverkefni, Encounters with the Paranormal, ásamt kennslustyrk skólaárið 2011– 2012 við Íslensku- og menningardeild. Hún var enn fremur þátttakandi í verkefninu Translatio sem laut að þýðingarhugtakinu í víðasta skilningi og var styrkt af Norræna rannsóknasjóðnum.