Styrkir til framhaldsnáms í viðskiptafræði og tónlist | Háskóli Íslands Skip to main content

Styrkir til framhaldsnáms í viðskiptafræði og tónlist

18. október 2019
""

Auglýst er eftir umsóknum um styrk úr Ingjaldssjóði á árinu 2019. Nemendur Háskóla Íslands sem stunda eða eru að hefja framhaldsnám (meistara- eða doktorsnám) erlendis í rekstrarstjórnun eða alþjóðlegum viðskiptum eiga kost á styrk og sömuleiðis framhaldsnemendur í tónlist erlendis (meistara- og doktorsnemar). Aðeins þær umsóknir koma til greina sem falla að markmiðum sjóðsins.

Umsóknarfrestur er til og með 18. nóvember 2019.

Tilgangur Ingjaldssjóðs helgast af fyrirmælum í erfðaskrá Ingjalds Hannibalssonar. Sjóðurinn hefur það hlutverk að styrkja efnilega nemendur Háskóla Íslands til framhaldsnáms erlendis í rekstrarstjórnun, alþjóðlegum viðskiptum eða nemendur í tónlist. 

Heildarfjárhæð úthlutaðra styrkja getur verið allt að þrjár milljónir króna.

Ingjaldssjóður er stofnaður af Háskóla Íslands til minningar um dr. Ingjald Hannibalsson, prófessor við Viðskiptafræðideild skólans, f. 17. nóvember 1951, d. 27. október 2014.  Ingjaldur arfleiddi Háskólann að öllum eigum sínum. 

Óskað er eftir að í umsókn komi fram:
 
i.    Nafn umsækjanda, kennitala, heimilisfang, sími og virkt netfang. 

ii.    Framhaldsnám og stutt og lýsing á námsbraut og sérhæfingu sem sótt er um, sem nýta má til almennrar umfjöllunar og kynningar, hljóti umsóknin styrk. 

iii.    Nánari lýsing á framhaldsnáminu (ein bls. A4) auk upplýsinga um skólann ásamt staðfestingu á skólavist. 

iv.    Tímaáætlun og fjárhagsáætlun fyrir námið, ásamt upplýsingum um annan fjárhagslegan stuðning sem sótt er um vegna námsins. 

v.    Helstu atriði úr náms- og starfsferli umsækjanda, þar með talið staðfestingu á námsárangri til fyrstu háskólagráðu. Tónlistarnemar sendi jafnframt upptökur með leik/söng eða afriti af tónsmíðum.

vi.    Hnitmiðuð greinargerð (ein bls. A4) um það hvernig umsókn samræmist markmiði og tilgangi sjóðsins, að mati umsækjanda.

Styrkþega ber að skila sjóðnum skriflegri greinargerð um stöðu námsins innan árs frá afhendingu styrks. 

Hámarkslengd umsóknar eru þrjár síður. Farið er með allar umsóknir sem trúnaðarmál. Stjórn áskilur sér rétt til að veita fleiri en einum umsækjanda styrk, hafna öllum og/eða úthluta styrkjum með öðrum hætti.

Umsóknum, merktum Ingjaldssjóði, skal skila sem viðhengi á netfang Styrktarsjóða Háskóla Íslands, sjodir@hi.is. Áætlað er að styrkjum verði úthlutað í byrjun árs 2020. 

Frekari upplýsingar um styrkveitingu og úthlutun er að finna á sjóðavef Háskóla Íslands eða hjá Helgu Brá Árnadóttur, verkefnisstjóra Styrktarsjóða Háskóla Íslands, helgab@hi.is, sími 525-5894.

Nemendur í Veröld