Styrkir til doktorsnáms og nýdoktora í ljósmóður- og hjúkrunarfræði | Háskóli Íslands Skip to main content
18. nóvember 2019

Styrkir til doktorsnáms og nýdoktora í ljósmóður- og hjúkrunarfræði

Minningarsjóður Bjargar Magnúsdóttur ljósmóður og Magnúsar Jónassonar bónda auglýsir eftir umsóknum um styrki úr sjóðnum. Markmið og hlutverk sjóðsins er að styrkja ljósmæður og hjúkrunarfræðinga til framhaldsnáms. Hjúkrunarfræðingar sem lokið hafa meistaranámi í ljósmóðurfræði og hafa ljósmóðurleyfi  skulu hafa forgang umfram aðra hjúkrunarfræðinga um styrk úr sjóðnum. Styrkir eru veittir til doktorsnáms og/eða til nýdoktora.

Umsóknarfrestur er til 28. nóvember 2019.

Heildarfjárhæð styrks er 2,5 milljónir króna.

Í umsókn um styrk þurfa eftirfalin atriði að koma fram: 
•    Nafn umsækjanda, kennitala, heimilisfang, sími og virkt netfang.
•    Helstu atriði úr náms- og starfsferli og ritaskrá umsækjenda/leiðbeinanda síðastliðin 5 ár.
•    Heiti rannsóknarverkefnis, markmið og vísindalegt gildi.
•    Hnitmiðuð lýsing á verkefninu, að hámarki 150 orð, sem verður nýtt til almennrar umfjöllunar og kynningar, hljóti verkefnið styrk.
•    Veigameiri lýsing á rannsóknarverkefni, að hámarki ein blaðsíða, þar sem fram kemur markmið verkefnisins, hvernig því er ætlað að auka við núverandi þekkingu á sviði rannsóknarinnar og hvernig það styður við markmið sjóðsins.
•    Rannsóknaráætlun sem felur m.a. í sér tímaáætlun, fjárhagsáætlun og helstu samstarfsaðila verkefnisins.
•    Hvernig styrkurinn verði notaður.
•    Annar fjárhagslegur stuðningur.
•    Nöfn, símanúmer og netföng þeirra sem leita má til um meðmæli.Hámarkslengd umsóknar er 3 síður fyrir utan fylgiskjöl.  Farið er með allar umsóknir sem trúnaðarmál. Stjórn sjóðsins áskilur sér rétt til að veita fleiri en einum umsækjanda styrk, hafna öllum og/eða úthluta styrkjum með öðrum hætti. 

Sjóðurinn var stofnaður við Háskóla Íslands 22. desember 2008 samkvæmt fyrirmælum í erfðaskrá Soffíu Þuríðar Magnúsdóttur, til minningar um foreldra hennar, Björgu Magnúsdóttur ljósmóður og Magnús Jónasson bónda sem bjuggu allan sinn búskap í Túngarði á Fellsströnd í Dölum. Björg var þar umdæmisljósmóðir árabilið 1910-1951. 

Áhersla er lögð á vönduð fræðileg vinnubrögð við gerð umsóknar. Gert er ráð fyrir að styrkþegi skili sjóðnum skýrslu með helstu niðurstöðum og árangri af verkefninu þegar því lýkur. 

Áætlað er að úthlutun fari fram við hátíðlega athöfn í byrjun árs 2020.

Umsóknum skal skila sem viðhengi á netfang Styrktarsjóða Háskóla Íslands: sjodir@hi.is.

Hægt er að styrkja sjóðinn með frjálsum framlögum, t.d. í tilefni brautskráningar eða árgangsafmæla. Fjárhæðir má leggja inn á eftirfarandi bankareikning hjá Landsbankanum, 0111-26-5712, og merkja innborgunina sjóðnum. Kennitala Styrktarsjóða HÍ er 571292-3199.

Frekari upplýsingar er að finna á sjóðavef Háskóla Íslands. Einnig hjá Helgu Brá Árnadóttur, verkefnisstjóra styrktarsjóða og hollvina HÍ, helgab@hi.is, sími 525-5894. 

Ljósmóðir í vitjun