Sálrækt fyrir háskólanema aftur af stað | Háskóli Íslands Skip to main content

Sálrækt fyrir háskólanema aftur af stað

19. september 2019

Sálfræðiráðgjöf háskólanema við Háskóla Íslands býður í vetur upp á Sálrækt sem er hópmeðferð fyrir háskólanema sem vilja leysa úr sálrænum vanda og vinna í að rækta geðheilsu sína. Byrjað var að bjóða upp á hópmeðferðina á síðasta skólaári og skilaði hún góðum árangri samkvæmt mælingum. Þrír sálfræðingar, sem eru í doktorsnámi við Sálfræðideild, og forstöðumaður ráðgjafarinnar stýra hópmeðferðinni. Nú á skólaárinu 2019-2020 verða hópfundir haldnir á föstudögum vikulega kl. 13-14.30.  

Áhugasamir geta sent póst á hopmedferd@hi.is með nafni sínu og símanúmeri til að sækja um þátttöku og verða svo boðaðir í inntökuviðtal. Athugið að þátttökufjöldi er takmarkaður. Um er að ræða opinn hóp þar sem þátttakendur vinna að markmiðum sínum og nýjir þátttakendur geta komist að þegar þau markmið hafa náðst og pláss losna. 

Nánari upplýsingar um Sálrækt má finna  á vefsíðu Sálfræðideildar

Sálfræðiráðgjöf háskólanema hefur verið starfrækt frá árinu 2013. Markmið hennar er að þjálfa framhaldsnema í sálfræði í klínískum störfum og veita bæði háskólanemum og börnum þeirra sálfræðiþjónustu gegn afar vægu gjaldi. Frá upphafi hafa um 120 sálfræðinemar hlotið þar starfsþjálfun og skipta málin sem komið hafa til kasta þeirra hundruðum. Við Sálfræðiráðgjöf háskólanema er fengist við fjölbreyttan vanda, t.d. kvíða, þunglyndi, frestanahneigð, fullkomnunaráráttu, lágt sjálfsmat, svefntruflanir, félagsfælni og fleira. 

Nánari upplýsingar um Sálfræðiráðgjöf háskólanema er að finna á vef Háskóla Íslands.
 

Logo Sálræktar