Rætt um stöðu hug- og félagsvísinda á fundi Aurora
Staða hug- og félagsvísinda í nútímanum var til umfjöllunar á fundi Aurora-samstarfsnetsins sem fram fór í University of East Anglia í Norwich í Englandi í liðinni viku. Samstarfsnetið fagnar eins árs afmæli um þessar mundir.
Háskóli Íslands tekur þátt í Aurora sem er samstarfsnet níu virtra evrópskra háskóla sem eiga það sameiginlegt að leggja í starfi sínu áherslu á hágæða rannsóknir, samfélagslega ábyrgð og að gera samfélögum betur kleift að takast á við áskoranir samtímans. Netið var sett á laggirnar í fyrrahaust og hafa skólarnir níu unnið að þróun þess síðan þá.
Hópur starfsmanna og stúdenta frá Háskóla Íslands sótti fund samstarfsnetsins við University of East Anglia í Norwich undir lok síðustu viku þar sem rætt var um hvernig skólarnir geta eflt samstarf sitt og lært hver af öðrum.
Á seinni degi fundarins í Norwich var efnt til umræðna undir yfirskriftinni „What will the Humanities & Social Sciences do for us?“ Meðal þátttakenda í umræðunum var Guðmundur Hálfdánarson, forseti Hugvísindasviðs. Rætt var um gildi þessara fræðasviða í samtímanum, hvernig mætti efla þau og sömuleiðis um leiðir til þverfræðilegrar samvinnu á þessum sviðum.
Upptöku af umræðum um stöðu hug- og félagsvísinda er hægt að nálgast á Facebook-síðu Aurora-samstarfsnetsins.