Nýstárlegar hugmyndir frá frumkvöðlum framtíðarinnar
Flugvéladekkjaskeið, sturtuhandklæðaskápur og hjálmalás voru meðal verkefna sem verðlaunuð voru í úrslitum Nýsköpunarkeppni grunnskólanna (NKG) sem fram fór um liðna helgi. Háskóli Íslands er meðal helstu bakhjarla keppninnar.
Keppnin er ætluð 5.-7. bekkingum og var nú haldin í 28. sinn. Yfir 1200 hugmyndir frá 38 skólum víðs vegar af landinu bárust að þessu sinni og voru 26 þeirra valdar til að taka þátt í vinnusmiðju og úrslitakeppni dagana 24.-26. maí. Að baki hugmyndunum stóðu alls 40 nemendur en þeir komust í gegnum strangt matsferli þar sem uppfinningar þeirra voru metnar með tilliti til hagnýti, nýnæmi og markaðshæfi.
Veitt voru verðlaun fyrir fyrsta til þriðja sætið í keppninni auk sérstakra viðurkenninga fyrir framúrskarandi lausnir á sviði fjármála, tækni, samfélagslegrar nýsköpunar, forritunar, hönnunar og umhverfismála.
Auk þess fékk hópur þátttakenda viðurkenningarskjal ásamt gjafabréfi í ýmist FAB LAB smiðju Nýsköpunarmiðstöðvar Íslands í Vestmannaeyjum, Háskóla unga fólksins í Háskóla Íslands árið 2019 eða IKEA.
Nánari upplýsingar um verðlaunahafa er að finna á vef keppninnar.
Við sama tilefni fengu tveir kennarar hvatningarverðlaun fyrir framúrskarandi störf við eflingu nýsköpunarmenntunar á Íslandi og hljóta báðir nafnbótina „Nýsköpunarkennari grunnskólanna árið 2018“. Þetta eru þær Sædís Arndal í Hofsstaðaskóla og Arna Björk H. Gunnarsdóttir í Vesturbæjarskóla.
Háskóli Íslands er meðal helstu bakhjarla Nýsköpunarkeppni grunnskólanna. Skólinn styður hana með fjárframlagi auk þess sem starfsfólk skólans kemur að dómnefndarstörfum og leiðsögn í vinnusmiðjum sem haldnar eru úrslitahelgina. Þá veitti skólinn tíu þátttakendum sem komust í úrslit gjafabréf í Háskóla unga fólksins sem fyrr segir. Það var Guðbjörg Linda Rafnsdóttir, aðstoðarrektor vísinda við Háskóla Íslands, sem afhenti þátttakendum gjafabréfin.
