Lært með leiðtogum í nýrri fyrirlestraröð á Menntavísindasviði

Lærum með leiðtogum er heiti á nýrri fyrirlestraröð sem forseti Menntavísindasviðs Háskóla Íslands hleypir af stokkunum í október.

Allir fyrirlesarar eiga það sameiginlegt að vera leiðtogar og brautryðjendur á ólíkum sviðum samfélagsins. Þau munu segja frá verkefnum sínum og ekki síst miðla sínum persónulega lærdómi af því að takast á við áskoranir. Fyrirlestrarnir munu fjalla um menntun, hreyfingu, andlega líðan, kvikmyndir, jafnrétti og eitraða karlmennsku, markmiðasetningu, samskipti, ímyndunaraflið og samfélagslega þátttöku.

Lærum með leiðtogum hefur það markmið að veita nemendum og starfsfólki Háskólans innblástur, skapa umræður og vera uppspretta lærdóms. Menntavísindasvið býður einum framhaldsskóla á hvern viðburð til að mynda betri tengsl og byggja brýr milli skólastiga.

„Hugmyndin að baki Lærum með leiðtogum er að opna Menntavísindasvið fyrir þeim straumum og krafti sem er í samfélaginu og fá í heimsókn einstaklinga sem ég veit að munu snerta við okkur á einn eða annan hátt. Það skiptir máli að við yfirvegum hvernig lífi við viljum lifa, í hvernig tengslum við viljum vera við umhverfi okkar og annað fólk. Hér skipta skólarnir og hið formlega menntakerfi miklu máli, en ekki síður hinn óformlegi vettvangur og sú reynsla sem við fáum með þátttöku í félags- og tómstundastarfi. Lífið sjálft er lærdómur og það verður dýrmætt að fá að læra af og með þeim leiðtogum sem heimsækja okkur í vetur,“ segir Kolbrún Þ. Pálsdóttir, forseti Menntavísindasviðs Háskóla Íslands.