Áskorun rektora til verðandi ríkisstjórnar | Háskóli Íslands Skip to main content
7. nóvember 2016

Áskorun rektora til verðandi ríkisstjórnar

Við undirrituð, rektorar allra háskóla á Íslandi, óskum verðandi ríkisstjórn heilla í þeim störfum sem bíða hennar á nýju kjörtímabili. Fjárfesting í innviðum íslensks samfélags er meðal mikilvægustu verkefna sem bíða. Málefni háskólanna, rannsóknir og nýsköpun eru þar á meðal.  

Úttektir Efnahags- og framfarastofnunarinnar (OECD) sýna að íslenskir háskólar eru verulega undirfjármagnaðir og fá helmingi lægra framlag á hvern nemenda en háskólar annars staðar á Norðurlöndum. Þessu verður að breyta og auka verulega fjárfestingu í háskólum á næstu árum. Tryggja verður að fjármögnun hvers nemenda á Íslandi sé sambærileg við önnur norræn ríki. Ef háskólakerfið á Íslandi á ekki að verða fyrir frekari skaða þarf að ná þessu mikilvæga markmiði og hækka framlög til háskólanna að lágmarki um tvo milljarða króna árlega á næstu árum.

Í kjölfar ákalls okkar til stjórnmálamanna í byrjun október komust málefni háskólastigsins og fjármögnun háskólanna á dagskrá. Í aðdraganda kosninga tóku fulltrúar allra flokka sem nú eiga sæti á Alþingi undir ákallið og staðfestu mikilvægi fjárfestingar í háskólum til að efla framþróun samfélagsins og samkeppnishæfni Íslands. 

Við skorum á verðandi ríkisstjórn og alla nýkjörna þingmenn að fylgja eftir orðum flokka sinna um aukna fjárfestingu í íslenskum háskólum. Mikilvægt er að ný ríkisstjórn geri sem fyrst áætlun um hækkun fjárframlaga til háskólastigsins sem er í takt við stefnu stjórnvalda í flestum nágrannaríkja okkar. Slíkt felur í sér fjárfestingu í velsæld, atvinnutækifærum og í framtíð landsins.

Jón Atli Benediktsson, rektor Háskóla Íslands

Ari Kristinn Jónsson, rektor Háskólans í Reykjavík

Eyjólfur Guðmundsson, rektor Háskólans á Akureyri

Fríða Björk Ingvarsdóttir, rektor Listaháskóla Íslands

Vilhjálmur Egilsson, rektor Háskólans á Bifröst

Erla Björk Örnólfsdóttir, rektor Háskólans á Hólum

Björn Þorsteinsson, rektor Landbúnaðarháskóla Íslands

Jón Atli Benediktsson, Ari Kristinn Jónsson, Fríða Björk Ingvarsdóttir, Björn Þorsteinsson, Erla Björk Örnólfsdóttir, Eyjólfur Guðmundsson og Vilhjálmur Egilsson.
Jón Atli Benediktsson, Ari Kristinn Jónsson, Fríða Björk Ingvarsdóttir, Björn Þorsteinsson, Erla Björk Örnólfsdóttir, Eyjólfur Guðmundsson og Vilhjálmur Egilsson.