Áframhaldandi samstarf á milli HHÍ og HÍ um stuðning við Vísindavefinn

Nýlega var undirritaður samningur um áframhaldandi stuðning Happdrættis Háskóla Íslands og Háskóla Íslands við Vísindavef HÍ. Happdrætti Háskólans og Háskóli Íslands eru aðalstyrktaraðilar Vísindavefsins og stuðningur þeirra tryggir grunnrekstur vefsins.

Vísindavefur Háskóla Íslands varð 20 ára á þessu ári og hefur fyrir löngu sannað sig sem einn mikilvægasti vettvangur vísindamiðlunar fyrir fróðleiksfúsan almenning jafnt sem fræðasamfélagið. Aðsókn að Vísindavefnum hefur vaxið jafnt og þétt frá upphafi og á seinasta ári voru lesendur um milljón talsins. Þeim fjölgaði um rúm 26% frá árinu 2018 og hafa aldrei verið fleiri. Börn og unglingar eru í hópi þeirra sem spyrja Vísindavefinn flestra spurninga.

Vísindavefurinn hefur síðustu vikur lagt mikið af mörkum til upplýstrar umræðu um COVID-19-sjúkdóminn og nýju kórónuveiruna og meðal annars sett á laggirnar sérstaka ritnefnd fræðimanna sem hafa ásamt öðrum svarað fjölda spurninga sem brenna á landsmönnum á þessum óvissutímum. Vefurinn á nú enn fremur í samstarfi við vinnuhóp þjóðaröryggisráðs gegn upplýsingaóreiðu og COVID-19 en með því á að stuðla að því að fjölmiðlar og almenningur geti leitað staðfestingar á upplýsingum um faraldurinn, líkt og tíðkast víða erlendis.

Happdrætti Háskóla Íslands hefur allt frá stofnun Vísindavefsins lagt fram þá fjárhagslegu kjölfestu sem vefurinn hefur þurft. Áframhaldandi samstarf þessara aðila sýnir vel þann áhuga og skilning sem forsvarsmenn HHÍ hafa á miðlun nútímavísinda til ungs fólks og almennings í landinu.

Markmið samningsins er að skapa Vísindavefnum sem öruggastan starfsgrundvöll á næstu árum og tryggja áframhaldandi farsælt samstarf á milli aðilanna.