Nýsköpun og viðskiptaþróun

Í náminu er lögð áhersla á að nemendur öðlist fræðilegan grunn á sviði nýsköpunar- og frumkvöðlafræða en fari einnig í gegnum verklega þætti nýsköpunarferlisins, allt frá hugmyndasmíð, að þróun viðskiptalíkans og framkvæmd. Nemendur í náminu munu vinna náið með nemendum úr öðrum deildum Háskólans (sjá „Kjarni í nýsköpun og viðskiptaþróun“ hér að neðan).

Námið hentar bæði fyrir einstaklinga með grunnnám úr félagsvísindum sem vilja styrkja færni sína í nýsköpun og viðskiptaþróun og fyrir einstaklinga með menntun á öðrum sviðum sem vilja styrkja þekkingu á viðskiptafræði og vöruþróun með það að markmiði að stunda nýsköpun eða frumkvöðlastarf á sínu sérsviði.

Undirstaða kjarnans er námskeið um framkvæmd nýsköpunar sem nær yfir tvö misseri. Þar takast  nemendur úr Viðskiptafræðideild og nemendur úr öðrum deildum saman á við  þær áskoranir sem felast í nýsköpun, afurðaþróun og nýtingu viðskiptatækifæra. Nemendur vinna  saman að umfangsmiklu verkefni sem felur í sér afurðaþróun byggða á sérþekkingu þar sem  viðskiptalegar forsendur tækifærisins eru í forgrunni.

Aðeins er hægt að taka takmarkaðan fjölda nemenda inn í námsleiðina vegna fjöldatakmörkunar í sum skyldunámskeið. Við val á nemendum er horft til inntökuskilyrða þeirra sem farið er yfir í tilsvarandi kafla hér að neðan.
Til að hægt sé að fjalla um umsóknina á fullnægjandi hátt er mikilvægt að henni fylgi eftirfarandi gögn:

Greinargerð um bakgrunn, áhugasvið, forsendur og væntingar

• Hér er tækifæri til að koma á framfæri upplýsingum um reynslu nemandans, ástæðuna fyrir því að nemandinn hefur áhuga á þessari námsleið, væntingar til námsins og hvernig nemandinn telur að námið muni nýtast í framtíðinni
• Gert er ráð fyrir um það bil 200-400 orðum, eða hálfri til einni blaðsíðu

Ferilskrá með upplýsingum um fyrri störf og aðra reynslu

Námsferilsyfirlit með námskeiðum og einkunnum

• Staðfest afrit námsferilsyfirlits er skilyrði áður en einstaklingar eru skráðir í námið, en til að flýta fyrir afgreiðslu óskum við einnig eftir að umsækjendur sendi skannað afrit eða ljósmynd af námsferilsyfirliti með umsókn

Vinsamlegast skilið gögnunum sem viðhengi við umsóknina á PDF formi.

Nemendur þurfa samtals að ljúka námskeiðum að lágmarki 90 e. (12 námskeið) og skila MS ritgerð að lágmarki 30 e. til þess að ljúka meistaranámi í nýsköpun og viðskiptaþróun. Að auki þurfa þeir sem ekki hafa BS/BA próf í viðskipta- eða hagfræði að ljúka námskeiðinu Inngangur að rekstri.

ATH: Námskeið við Viðskiptafræðideild eru alla jafna 7,5 einingar.

Ástæða er til að vekja athygli á muninum á námsleið til MS náms í nýsköpun og viðskiptaþróun hjá Viðskiptafræðideild og kjarnanámskeiðum í nýsköpun og viðskiptaþróun. Námsleiðin er ein af átta námsleiðum í meistaranámi við Viðskiptafræðideild. Námsleiðin er hýst og á ábyrgð Viðskiptafræðideildar. Kjarninn samanstendur af námskeiðum í Viðskiptafræðideild og Verkfræði- og náttúruvísindasviði og þessar tvær skipulagseiningar hafa í sameiningu umsjón með kjarnanum og uppbyggingu hans.

Nemendur í námsleiðinni taka bæði námskeið úr kjarnanum og önnur námskeið. Í þeim námskeiðum sem eru í kjarnanum sitja bæði nemendur úr námsleiðinni og nemendur úr öðrum deildum.