Viðfangsefni félagsfræðinnar

Grunnnám í félagsfræði tekur þrjú ár. Unnt er að ljúka BA–prófi í félagsfræði sem aðalgrein til 180 eininga sem þýðir að nemendur taka tiltekin skyldunámskeið en hafa þó verulegt svigrúm með valnámskeið. Einnig er hægt að taka BA í félagsfræði sem aðalgrein til 120 eininga og velja þá aukagrein (60e) sem getur verið í fjölmiðlafræði eða innan annarra námsgreina (t.d. mannfræði, stjórnmálafræði o.s.frv.). Jafnframt er hægt að taka félagsfræði sem aukagrein (60e) og taka nemendur þá aðra aðalgrein til 120 eininga.

MA nám í félagsfræði er tveggja ára fræðilegt rannsóknarnám, þar sem áhersla er lögð á að skoða íslenskt samfélag í hnattrænu samhengi. Í náminu munu nemendur fá traustan grunn í kenningum og aðferðum félagsfræðinnar. Ísland er sérstaklega áhugavert vegna þeirra félagslegu breytinga sem átt hafa sér stað undanfarin ár, og má þar nefna efnahagshrunið og árangur í íþróttum og jafnréttismálum. Ennfremur hafa félagsfræðingar safnað gögnum um íslenskt samfélag sem eru einstök á heimsvísu, en þar má nefna unglingarannsóknir, rannsóknir á heilsu og velferð og viðhorfakannanir. Þannig samanstendur námið af sterkum fræðilegum grunni og áherslu á að rannsaka íslenskt samfélag í alþjóðlegu samhengi. Námið fer almennt fram á ensku, sem eykur möguleika nemenda á námi og starfi í löndum utan Íslands, en öllum verkefnum má skila hvort sem er á ensku eða íslensku. Dæmi um valnámskeið: • (Ó)jöfnuður í norrænum velferðarríkjum • Mismunun í velferðarríkjum: Kyn, kynhneigð og þjóðarbrot • Hnattvæðing, atvinnulíf og margbreytileiki • Afbrot, heilsa og tómstundir ungs fólks • Ójöfnuður og heilsa

Í náminu fá nemendur fræðilega þekkingu á margbreytileika, fjölmenningu og tengdum viðfangsefnum svo sem fólksflutningum, þjóðerni, kynþáttahyggju, kynjafræði, aðlögun og samþættingu. Inntökuskilyrði í ofangreindar MA námsleiðir er BA-, B.Ed-, BS-próf með fyrstu einkunn eða sambærilegt háskólapróf. Hafi nemandi ekki grunn í félagsfræði kann að vera gerð forkrafa um að nemandi taki námskeið aukalega í kenningum og aðferðafræði.

MA nám í aðferðafræði er markvisst nám í fjölbreyttum rannsóknaraðferðum félagsvísinda. Nemendur fá fræðilega og hagnýta þekkingu á aðferðafræði félagsvísinda, kynnast helstu rannsóknaraðferðum (t.d. spurningalistakönnunum, viðtölum, athugunum á skráðum gögnum) og fá haldbæra þekkingu og reynslu af rannsóknarvinnu. Inntökuskilyrði í MA nám í aðferðafræði eru þau sömu og í MA nám í félagsfræði. Að auki er gerð krafa um að nemendur hafi lokið eftirfarandi námskeiðum eða sambærilegum: FÉL204G Aðferðafræði: Rannsóknaraðferðir félagsvísinda og FÉL306G Tölfræði I.

Hægt er að taka diplómanám til 30 eininga að loknu BA-, B.Ed-, BS– prófi eða sambærilegu háskólaprófi. Diplómanám er einkum ætlað þeim sem ekki eru tilbúnir að fara í MA nám (eða sem uppfylla ekki kröfur um fyrstu einkunn í grunnnámi) en vilja fara í stutt hagnýtt nám á tilteknum sviðum. Námið getur einnig gegnt hlutverki endurmenntunar fyrir þá sem eru á vinnumarkaði. Góður námsárangur í diplómanámi fullnægir skilyrðum til að komast í MA nám í félagsfræði. Diplómanámið er metið að fullu inn í allar MA námsleiðir í félagsfræði. Í boði eru eftirtaldar þrjár námsleiðir í diplómanámi: Diplómanám í afbrotafræði Markmið diplómanáms í afbrotafræði er að veita nemendum fræðilega og hagnýta þekkingu á sviði afbrota og frávikshegðunar. Fræðilegar skýringar á eðli og umfangi afbrota eru greindar og sjónum beint að þeim aðilum sem hafa með meðferð og afgreiðslu hegningarlagabrota í stjórnkerfinu sjálfu að gera, s.s. lögreglu, ákæruvaldi og fangelsiskerfi. Diplómanám í rannsóknaraðferðum félagsvísinda Markmið diplómanáms í rannsóknaraðferðum félagsvísinda er að veita nemendum fræðilega og hagnýta þekkingu á sviði rannsóknaraðferða og aðferðafræði félagsvísinda. Diplómanám í stjórnun atvinnulífs og velferðar Markmið diplómanáms í stjórnun atvinnulífs og velferðar er að veita nemendum fræðilega og hagnýta þekkingu á sviði vinnumarkaðar, skipulagsheilda og velferðarmála. Sjónum er beint að nýjum áskorunum, bæði hnattrænum og staðbundnum, og mögulegum viðbrögðum við þeim.

Markmið doktorsnáms í félagsfræði er að veita nemendum þjálfun í sjálfstæðum vísindalegum vinnubrögðum og búa þá undir vísindastörf og háskólakennslu. Námsbraut í félagsfræði á í samstarfi við erlenda háskóla og eru nemendur hvattir til að verja hluta af námsferlinum erlendis. Hafi nemandi tekið allt fyrra háskólanám hér á landi, skal hann taka að lágmarki eina önn við erlendan háskóla.