Við hvetjum þig til þess að tilkynna slíkt til þinnar deildar.

Við hvetjum þig eindregið til þess að nýta netspjall skólans sem er hér til hægri neðarlega á síðunni. Þar geturðu fengið samband við öll fræðasvið og flestar þjónustueiningar skólans. Opnunartími flestra eininga er frá kl. 9-16 en einnig er hægt að senda skilaboð utan opnunartíma.

Starfsfólk Náms- og starfsráðgjafar er einnig til þjónustu reiðubúið, þurfir þú á aðstoð tengdri náminu að halda. Hjá NSHÍ er veitt náms-, starfs- og sálfræðiráðgjöf eins og lesa má um á vef ráðgjafarinnar. Þar er einnig að finna ýmiss konar gagnlegt efni. Hægt er að hafa samband við Náms- og starfsráðgjöf alla virka daga kl. 9:00-12:00 og 13:00-16:00 í síma 525-4315. Þú getur einnig rætt við náms- og starfsráðgjafa í netspjalli Háskólans eða sent fyrirspurnir á netfangið radgjof@hi.is.

Þurfirðu á tækniþjónustu að halda getur haft samband við upplýsingatæknisvið skólans á netspjalli skólans, í gegnum símanúmerið er 525-4222 eða netfangið help@hi.is.

Fyrst og síðast er handþvottur mikilvægasta sýkingavörnin sbr. leiðbeiningar Landlæknisembættisins og Vísindavefs Háskóla Íslands. 

Mikilvægt er að gleyma ekki útivist og hreyfingu en hún gegnir lykilhlutverki í andlegri og líkamlegri vellíðan. Við núverandi aðstæður er ekki óeðlilegt að finna til kvíða og annarra tilfinninga sem erfitt er að kljást við. Á vef Náms- og starfsráðgjafar má finna hollráð til nemenda frá sálfræðingum náms- og starfsráðgjafar en einnig er hægt að hafa samband við þá. Við hvetjum nemendur enn fremur til þess að gæta hver að öðrum og halda sambandi gegnum netið.

• Kennsla verður á rafrænu formi. Stór hluti af kennslu skólans fyrir rafrænn fyrir, t.d. fyrirlestrar, samskipti nemenda og kennara, umræður, verkefnaskil, námsmat og fleira. Kennarar og starfsfólk skólans kappkosta að kynna þessi úrræði enn frekar og auka við þau eftir þörfum, ekki síst hvað varðar námsmat og lokapróf ef á þarf að halda.
• Nemendur eru hvattir til að fylgjast vel með tilkynningum frá kennurum.
• Engin verkleg kennsla mun fara fram í Háskóla Íslands óháð hópastærðum. Nemendur í verklegu námi eru hvattir til að afla sér nánari upplýsinga hjá fræðasviðum og kennurum sínum.
• Á vef Heilbrigðisvísindasviðs má fá upplýsingar um um klíníska kennslu á sviðinu.
• Háskóli Íslands hefur ásamt samstarfsskólum sínum innan edX-samstarfsnetsins opnað á aukinn aðgang að vef edX fyrir alla kennara og nemendur. Þar er hægt að skrá sig í yfir 2500 netnámskeið frá um 50 háskólum víða um heim en markmiðið með aðgerðinni er að hjálpa háskólasamfélögum að takast á við þær áskoranir sem þau standa frammi fyrir vegna COVID-19. Kennarar í Háskólanum geta skólans nýtt sér efni netnámskeiðanna sem stuðning í kennslu sinni og nemendur sótt ítarefni og tekið þátt í fjölbreyttum netnámskeiðum. Nánari upplýsingar eru á vef Háskólans.

Háskólaráð gerði þann 20. mars eftirfarandi samþykkt: 

„Þrátt fyrir ákvæði reglna fyrir Háskóla Íslands nr. 569/2009 og annarra reglna Háskólans sem í gildi eru um kennslu, fyrirkomulag prófa og námsmat gildir eftirfarandi ákvæði um vormisseri háskólaársins 2019-2020:

Í ljósi aðstæðna sem skapast hafa vegna COVID-19 veirufaraldursins og fyrirmæla stjórnvalda í því efni og þar með áhrifa á starfsemi Háskóla Íslands er fræðasviðum og deildum heimilt í nánu samráði við kennslusvið að ákveða með hvaða hætti framkvæmd kennslu, prófa og námsmats vegna vormisseris 2020 verður fyrir komið. Tryggt verði eftir föngum að gera nemendum kleift að ljúka þeim námskeiðum vormisseris sem þeir eru skráðir í. Um námsmat fer eftir gildandi reglum eftir því sem frekast er unnt.

Auglýsing þessi er birt með stoð í lögum nr. 85/2008 um opinbera háskóla og taka ákvæði hennar þegar gildi.“

Í kjölfar ofangreindrar samþykktar háskólaráðs útfærðu stjórnendur skólans samþykktina með eins og hér segir:

•  Próf verða ekki haldin í húsakynnum Háskóla Íslands á þessu misseri heldur verður framkvæmd prófa og námsmat í samræmi við ákvörðun háskólaráðs 20. mars. 
• Kennarar og deildir geta farið mismunandi leiðir við að útfæra námsmat í stað hefðbundinna prófa í húsakynnum Háskólans. Umsjónarkennarar í samráði við fræðasvið og deildir munu leitast við að kynna fyrir helgina 28.-29. mars breytta framkvæmd prófa og námsmats, og eigi síðar en 30. mars nk. Stjórnendur skólans hvetja fræðasvið, deildir og kennara til að taka tillit til þeirra krefjandi aðstæðna sem nú eru uppi og létta álagi af nemendum í tengslum við námsmat þegar hægt er.
• Markmiðið er að nemendur geti lokið þeim námskeiðum sem þeir eru skráðir í á vormisseri 2020 og þeim námskeiðum haustmisseris 2019 sem eru á auglýstri próftöflu vegna sjúkra- og endurtökuprófa. Haft verður samráð við fulltrúa nemenda um breytta framkvæmd prófa og námsmats eftir því sem kostur er.

Háskólinn stefnir að því að brautskrá nemendur á hefðbundnum tíma í lok júní. Ekki er þó víst að sérstök brautskráningarathöfn verði haldin líkt og lengi hefur tíðkast. Nemendur sem vinna að lokaverkefnum eru hvattir til að halda því áfram og að vera í góðu sambandi við leiðbeinanda sinn um netið. 

Því miður er það ekki hægt, allar byggingar verða lokaðar. Nemendur munu því ekki hafa aðgang að byggingum. Doktorsnemar hafa þó sama aðgang að byggingum og starfsfólk. Ef þú ert með eigur í einhverjum bygginga skólans sem þú þarft að nálgast hvetjum við þig til að hafa samband við vaktsíma umsjónarmanna (834-6512).

Nei, Þjóðarbókhlaðan verður lokuð á meðan á samkomubanninu stendur. Meðan á lokuninni stendur munu starfsmenn hennar þó leggja sig fram um að koma til móts við óskir um þjónustu eins og hægt er, eins og lesa má um á vef bóksasafnsins.

Hægt er að fá lánaðar bækur þótt safnið sé lokað. Nemendur eru beðnir um að senda tölvupóst á utlan@landsbokasafn.is og tilgreina þar titla sem þeir óska eftir að fá í láni. Starfsfólk safnsins annast umsýslu beiðna og gengur frá pöntunum sem svo er hægt að sækja í vörumóttöku safnsins (við Birkimel) milli 13-15 alla virka daga. Hringja þarf bjöllu við inngang og sýna skilríki.

Ritver Háskóla Íslands veitir þjónustu í gegnum vefinn. Hægt er að bóka tíma hjá ráðgjöfum versins á vefsíðu þess og fá leiðsögn í gegnum Skype (ritver í Stakkahlíð) eða Zoom (ritver í Þjóðarbókhlöðunni). 

Þú getur sent tölvupóst á netfangið haskolatorg@hi.is og starfsfólk Þjónustuborðsins sér um að koma staðfestingunni til þín með öruggum rafrænum hætti. 

Vegna mögulegra erfiðleika doktorsnema og nýdoktora á styrkjum við að sinna námi og vinnu vegna aðstöðuvanda, sem hefur komið upp í tengslum við COVID-19 faraldurinn, skal hafa eftirfarandi í huga:

• Reyna skal eftir fremsta megni að sinna vinnu heiman frá í þeim tilfellum þegar ekki er hægt að sinni henni í húsnæði Háskóla Íslands.

• Ef ljóst er að um óhjákvæmilegt vinnutap er að ræða, hvort sem ástæðan er tengd lokun húsnæðis, veikindum eða vegna annarra þátta, skal halda utan um þann tíma sem tapast og skýra ástæður vinnutapsins.

• Að loknu COVID-19 tímabilinu skal yfirlit um vinnutap og ástæður þess sent til mannauðsstjóra viðkomandi fræðasviðs, undirritað af doktorsnema/nýdoktor og leiðbeinanda/umsjónarmanni.

• Háskólinn mun leitast við að bæta doktorsnemum og nýdoktorum sem eru á styrk upp slíkt vinnutap. Hvert mál verður skoðað sérstaklega og afstaða tekin á grundvelli fyrirliggjandi upplýsinga svo fljótt sem auðið er.

• Vinsamlegast leitið til Vísinda- og nýsköpunarsviðs ef frekari upplýsinga er þörf.

Í ljósi erfiðleika við framkvæmd doktorsvarna vegna lokunar á húsnæði Háskólans og annarra vandamála tengd COVID-19 eru hlutaðeigandi beðnir að hafa eftirfarandi í huga:

• Deild ákveður hvort fresta skuli öllum doktorsvörnum sem fyrirhugaðar eru á meðan á samkomubanni stendur.
• Ef deild leyfir doktorsvarnir ákveður doktorsefnið í samráði við leiðbeinanda hvort fresta skuli viðkomandi doktorsvörn. 
• Doktorsvarnir á tímum samkomubanns fara fram í gegnum fjarbúnað. Andmælendur og doktorsnefnd eru tengd fjarbúnaði og vörninni er streymt til að aðrir geti fylgst með. 
• Lagt er til að doktorsefnið, leiðbeinandi og deildarforseti, sem stýrir vörn, séu staðsettir í sama rými í byggingu háskólans á meðan á vörn stendur og skulu hafa amk tveggja metra fjarlægð á milli sín. Aðrir eru ekki leyfðir í rýminu og geta einungis tekið þátt í vörninni í gegnum fjarbúnað eða fylgst með vörninni í gegnum streymið. 
• Deildarforseti ákveður nánari útfærslu á tilhögun varnarinnar við þessar óvenjulegu aðstæður.

Fyrir frekari upplýsingar er bent á verkefnisstjóra doktorsnáms á viðkomandi fræðasviði.

Íslensk stjórnvöld hvetja Íslendinga á ferðalagi erlendis til að íhuga að flýta heimför vegna lokunar landamæra víða um heim og röskunar á flugsamgöngum og erfitt gæti verið fyrir fólk að komast heim síðar. Ekki hafa verið gefin út tilmæli til námsmanna erlendis um að snúa heim til Íslands. Ef nemendur taka ákvörðun um að koma heim eru þeir beðnir um að tilkynna það til Skrifstofu alþjóðasamskipta. 

Borgaraþjónusta utanríkisráðuneytisins
Við hvetjum ykkur til að skrá ykkur í grunn borgaraþjónustu utanríkisráðuneytisins svo hægt sé að miðla til ykkar mikilvægum upplýsingum þegar þær berast. Einnig er hægt að senda fyrirspurn á hjalp@utn.is, hringja í neyðarsíma borgaraþjónustu +354 545-0-112 sem er opinn allan sólarhringinn eða senda skilaboð á Facebook.

Flestir geta klárað námsdvölina
Eins og staðan er í dag er Háskóli Íslands ekki að kalla nemendur heim en hins vegar eru aðstæður mismunandi milli landa og sumir nemendur hafa kosið að koma heim. Minnt er á mikilvægi þess að fylgja ráðleggingum landlæknis um sóttkví ef komið er heim. Frá og með fimmtudeginum 19. mars 2020 er Íslendingum og öðrum með búsetu á Íslandi og koma til landsins skylt að fara í tveggja vikna sóttkví án tillits til hvaðan þeir eru að koma. Nánari upplýsingar um sóttkví á vef landlæknis. 

Nemendur verða að meta aðstæður og taka ákvörðun um að koma heim eða dvelja áfram í gestalandinu. 

Skólinn er enn opinn eða býður upp á fjarkennslu
Ef skólinn þinn er enn þá opinn eða býður upp á fjarkennslu þá hvetjum við þig til að halda áfram að stunda námið og ljúka misserinu. 

Skólinn er lokaður og býður ekki upp á fjarkennslu 
Ef skólinn úti býður ekki upp á fjarkennslu eða aðra fjarnámsmöguleika og þú kemur heim þá skaltu hafa í huga að þú munt væntanlega ekki fá einingar fyrir dvölina.

Við ráðleggjum nemendum að hafa nokkur atriði í huga við ákvörðun um hvort þeir koma heim eða verða áfram erlendis:

• Ertu með undirliggjandi sjúkdóm?
• Hvernig er staðan á heilbrigðiskerfinu í gestalandinu og aðgangur að heilbrigðisþjónustu?
• Hvernig er aðstaða þín ef þú lendir í sóttkví?
• Hvenær lýkur misserinu og hvenær er heimkoma fyrirhuguð? Lokun landamæra víða um heim og minnkandi framboð flugferða gæti sett strik í reikninginn. 

Það er mikil óvissa vegna COVID-19 og ástand mála getur breyst hratt svo það er mikilvægt að fylgjast vel með.

• Skráðu þig í grunn borgaraþjónustu utanríkisráðuneytisins svo hægt sé að miðla til þín mikilvægum upplýsingum.
• Fylgdu ráðleggingum þíns gestaskóla og yfirvalda í landinu sem þú dvelur í.
• Fylgstu vel með uppfærslu upplýsinga hér á síðunni og tölvupóstum frá rektor Háskóla Íslands og Skrifstofu alþjóðasamskipta.
• Vertu í reglulegu sambandi við þína nánustu og hugaðu vel að heilsunni.

Sumir skiptinemar geta verið í þeirri stöðu að vilja snúa aftur en eiga þess ekki kost. Við hvetjum þá til að hafa strax samband við borgaraþjónustu utanríkisráðuneytisins og láta vita af stöðunni. Hægt að senda fyrirspurn á hjalp@utn.is, hringja í neyðarsíma borgaraþjónustu +354 545-0-112 sem er opinn allan sólarhringinn eða senda skilaboð á Facebook.

Ef þú ert ekki farin/n í skiptinámið:
Einstaklingur sem hefur lagt út fyrir kostnaði sem ekki fæst endurgreiddur á ekki að þurfa að bera hann sjálfur. Þetta kann að vera vegna flugs og/eða gistingar. Hafið samband við Skrifstofu alþjóðasamskipta. 

Ef þú kemur heim og lýkur ekki skiptináminu:
Ef þú kemur heim og lýkur ekki skiptináminu er samt ekki þörf á að endurgreiða þann styrk sem þegar hefur verið greiddur út (70%). Ef heimkoman kallar á aukin útgjöld sem útgreiddur styrkur nægir augljóslega ekki fyrir, til dæmis vegna þess að viðkomandi þarf að kaupa mjög dýran flugmiða á síðustu stundu eða ferðast gegnum önnur lönd vegna niðurfellingar á flugi, er hægt að skoða það að styrkja þau útgjöld á grundvelli raunkostnaðar og kvittana. Nemendur þurfa að sækja um það til Skrifstofu alþjóðasamskipta.

Ef þú lýkur skiptináminu: 
Ef þú skilar inn staðfestingu í vor á því að skiptinámið hafi farið fram (með einkunnayfirliti við lok skólaárs) hlýtur þú ekki bara 70% styrksins heldur einnig lokagreiðslu upp á 30%, óháð því hvort námið fór fram á staðnum, í fjarnámi og/eða með hléum. Ef tímabil námsdvalar er framlengt vegna viðbragða við COVID-19 verða nemendur að láta Skrifstofu alþjóðasamskipta vita um leið og það er tilkynnt og þá er hægt að skoða það að lengja styrktartímabilið. 

Í einhverjum tilfellum gæti áframhaldandi þátttaka í skiptináminu kallað á aukin útgjöld vegna COVID-19 sem útgreiddur styrkur nægir augljóslega ekki fyrir, til dæmis vegna þess að viðkomandi þurfti að fljúga heim og aftur út. Þá er hægt að skoða það að styrkja þau útgjöld á grundvelli raunkostnaðar og kvittana. Nemendur þurfa að sækja um það til Skrifstofu alþjóðasamskipta.

Á vef Landskrifstofu Erasmus+ er að finna gagnlegar upplýsingar og svör um áhrif COVID-19 á námsdvöl erlendis.

Eins og staðan er núna stefna allir samstarfsskólar okkar á að skiptinámið á næsta skólaári fari eðlilega fram þrátt fyrir COVID-19-faraldurinn. Það kann að vera einhver töf á svörum frá gestaskólunum og einhverjir hafa framlengt fresti. Við hvetjum þig því til þess að halda áfram með umsóknina þína og stefna á skiptinámið næsta haust. Ef aðstæður breytast verður haft samband við þig.

Við hvetjum þig til að hafa samband við Skrifstofu alþjóðasamskipta, annaðhvort í gegnum netspjallið hægra megin á síðunni eða á með því að senda tölvupóst á ask@hi.is.

Skiptinemar og aðrir erlendir nemendur geta stundað námið við Háskóla Íslands í gegnum fjarnám/rafrænt námsumhverfi á sama hátt og aðrir nemendur HÍ og við hvetjum þá eindregið til þess.

Við hvetjum erlenda nemendur einnig til að fylgjast vel með tilkynningum frá ríkisstjórn Íslands og ríkisstjórnum þeirra heimalanda. Rektor Háskóla Íslands sendir daglega upplýsingar á nemendur og starfsfólk og upplýsingasíða vegna COVID-19 á forsíðu vefs Háskóla Íslands er uppfærð dag hvern. 

You can also find aswers to all these questions in English.

Aðstæður erlendra nemenda við HÍ eru mjög mismunandi og því er misjafnt hvað þeir ákveða að gera. Sumir kunna að ákveða að vera áfram á Íslandi, aðrir velja að snúa aftur til heimalandsins eða hafa fengið fyrirmæli frá stjórnvöldum eða háskólanum í þeirra heimalandi um að gera það. Sum ykkar geta verið í þeirri stöðu að vilja snúa aftur en getið það ekki. Við munum gera okkar besta til að aðstoða ykkur og veita ykkur stuðning.

Ef þú ert erlendur skiptinemi við Háskóla Íslands Í áttu að hafa fengið tölvupóst frá Skrifstofu alþjóðasamskipta með stuttri könnun um COVID-19 og stöðu þína. Við biðjum þig að taka þátt í könnuninni svo við séum meðvituð um aðstæður þínar og getum aðstoðað ef þörf krefur.

Ef þú ert erlendur nemandi á eigin vegum vinsamlegast hafðu samband við deildina þína og kennara í námskeiðum og láttu vita hvað þú hyggst gera varðandi námið og hvort þú ætlir að dvelja áfram á Íslandi eða ekki. Þér er alltaf velkomið að hafa samband við okkur á Skrifstofu alþjóðasamskipta með því að senda póst á ask@hi.is eða nota netspjallið á english.hi.is.

Nemendur sem þegar eru skráðir í skólann velja sér námskeið fyrir næsta skólaár á Uglunni, innri vef skólans. Frestur til að ljúka vali rennur út 3. apríl.

Nýskráning í grunn- og framhaldsnám fer öll fram rafrænt í gegnum samskiptagátt skólans og umsóknarfrestur er sem hér segir:
-    Grunnnám: Umsóknarfrestur er til 5. júní. Athugaðu þó að umsóknarfrestur fyrir inntökupróf í læknisfræði og sjúkraþjálfun er til 20. maí.
-    Framhaldsnám: Umsóknarfrestur er til 15. apríl. Þó er hægt er að sækja um innritun í diplómanám á meistarastigi í deildum Félagsvísindasviðs og Menntavísindasviðs, Sagnfræði- og heimspekideild og í lýðheilsuvísindum til 5. júní.

Umsóknasíða Háskóla Íslands

Eftir að umsókn hefur verið send inn er handhægast fyrir umsækjendur að fylgjast afgreiðslu umsóknar með því að skrá sig inn í ofannefnda samskiptagátt, fara í „Yfirlit umsókna“ og þar mun birtast staða umsóknar sem og ýmis skilaboð frá HÍ, t.d. ef einhver fylgigögn með umsókn vantar. Ef óskað er eftir frekari upplýsingum um rafræna umsókn og stöðu umsóknar er best að senda tölvupóst á umsokn@hi.is. 

Best er að leita til nemendaskrár Háskólans. Hægt er að hafa samband við hana í gegnum netspjallið á vef skólans, með tölvupósti á nemskra@hi.is eða hringja í síma 525-4309. Athugaðu þó að símaþjónusta er verulega skert vegna fjarvinnu starfsfólks. 

Já, stefnt er að því að halda inntökuprófin fimmtudaginn 11. og föstudaginn 12. júní. Komi til þess að hætt verði við þau verður þar kynnt vel. 

Nemendur og starfsfólk eru beðnir sérstaklega að fylgjast vel með nýjustu upplýsingum um þau landsvæði sem skilgreind eru sem hættusvæði. Fólk ætti ekki að ferðast til þessara svæða en ef ekki verður hjá því komist, þarf fólk að fara í sóttkví skv. leiðbeiningum sóttvarnarlæknis og Landlæknis.

Stjórn Lánasjóðs íslenskra námsmanna hefur samþykkt heimild fyrir sjóðinn að taka til greina annars konar staðfestingar skóla á ástundun nemenda en vottorð um loknar einingar. Óski námsmaður þess verður tekið mið af umsóttum einingafjölda námsmanns í samræmi við lánsáætlun hans fyrir önnina. Það sama á við ef  námsmaður veikist af veirunni og getur þess vegna ekki sótt skóla í lengri tíma þannig að það hafi áhrif á námsframvindu hans

Sjá nánar á vef LÍN

Stjórn sjóðsins samþykkti að lengja umsóknarfrest vegna námslána, sem var 15. apríl fyrir vorönn, til 1. maí.

Best er að senda fyrirspurnir á lin@lin.is. 

Afgreiðsla sjóðsins er lokuð á meðan á neyðarstigi Almannavarna stendur vegna kórónaveirunnar. Gögn sem þurfa að komast til sjóðsins má senda í pósti eða setja í póstkassa í anddyri í húsakynnum sjóðsins í Borgartúni 21.

• Stúdentar eiga almennt ekki rétt á atvinnuleysisbótum. Undanþága hefur þó verið gerð á þessu á þessum óvenjulegu tímum að ákveðnum skilyrðum uppfylltum. Skilyrði er að þú þarft að hafa verið í vinnu en ef þú misstir 20% af starfshlutfalli þínu og heldur a.m.k. 25% starfshlutfalli áttu rétt á að ríkið komi til móts við launamissinn. Dæmi: Stúdent í 50% vinnu missir 25% starfshlutfall og er því kominn niður í 25% starfshlutfall. Viðkomandi getur sótt um úrræði um skert starfshlutfall hjá ríkinu og fengið launatapið bætt. Athugaðu að sækja þarf um þetta úrræði hjá Vinnumálastofnun.
• Engar atvinnuleysisbætur eru til staðar fyrir stúdenta að sumri til eins og er. Stúdentaráð Háskóla Íslands og Landssamtök íslenskra stúdenta vinna þó að því að þrýsta á um breytingar á þessu.