Dagana 27. og 28. nóvember verður blásið til alþjóðlegrar ráðstefnu um ljósmyndir með það að markmiði að efla þverfaglega umræðu meðal fræðimanna um faglega þekkingu og aðferðir við rannsóknir á ljósmyndum sem heimildum um fortíð og nútíð.
Rannsakendur á sviði ljósmynda, tísku, kvikmynda, menningar- og sjónfræða, listfræði og annarra greina sem tengjast skapandi iðnaði munu, fjalla um greiningu og notkun ljósmynda sem heimilda. Skoðuð verða fagurfræðileg og siðferðileg álitamál, ferli ljósmynda í tíma, ljósmyndir sem gildishlaðnar hugmyndafræðilegar smíðir og gildi mynda fyrir endurupplifun og skilning fólks á veruleikanum í fortíð og nútíð.
Ráðstefnan er skipulögð af Æsu Sigurjónsdóttur, lektor í listfræði við Háskóla Íslands og Michael Langkjær, lektor í sagnfræði við Saxo Institut Háskólann í Kaupmannahöfn, í samvinnu við CBS Kaupmannahöfn. Ráðstefnan er haldin á Þjóðminjasafni Íslands.
Ljósmynd: © Þorvaldur Ágústsson, Þjóðminjasafn Íslands
Nánari upplýsingar á vef ráðstefnunnar.
