Þrúður Gunnarsdóttir, MA, sálfræðingur og doktorsnemi í Lýðheilsuvísindum kynnir fyrstu niðurstöður í doktorsverkefni sínu.
Offita barna hefur aukist mikið á síðastliðnum áratugum. Eitt af því sem getur hjálpað til við að stemma stigu við áframhaldandi aukningu á tíðni of feitra barna er áhrifarík meðferð. Markmið þessa verkefnis hefur verið að prófa meðferðarefni frá Bandaríkjunum í klínískum íslenskum aðstæðum. Tilgangurinn hefur verið tvíþættur, annarsvegar að athuga hvort meðferðarefnið beri sama árangur og á rannsóknarstofu háskóla þar sem úrtök hafa verið einsleit, og hins vegar að setja á fót raunprófað meðferðarúrræði fyrir of feit íslensk börn sem mikil vöntun hefur verið á fram til þessa. Eftir forprófun á meðferðarefninu og forrannsókn var rannsókn gerð með 84 íslenskum fjölskyldum (of feit börn á aldrinum 8-12 ára og foreldrar þeirra). Fjölskyldunum hefur nú bráðum verið fylgt eftir í tvö ár eftir að meðferð lauk. Helmingur hópsins fékk hefðbundna meðferð og helmingur meðferð þar sem athugað var hvort viðbót nýs meðferðarþáttar, að þekkja mun á svengd og seddu (Appetite Awareness Training), hefði áhrif á árangur. Gögnum hefur verið safnað um breytingar á þyngd, hæð, líkamsþyngdarstuðli (BMI), lífefnafræðilegum breytum, líkamlegu ástandi, heilsutengdri hegðun, líðan og félagsfærni fyrir og eftir meðferð og til lengri tíma eftir meðferð. Niðurstöður gefa til kynna að meðferðin beri árangur með íslenskum börnum í klínískum aðstæðum en til að auka enn frekar áhrif meðferðar og meðferðarheldni hefur verið ákveðið að hanna nýtt meðferðarefni á grunni fyrri þekkingar og reynslu og með hliðsjón af sérstökum leiðbeiningum um hönnun áhrifaríkra íhlutana (Intervention Mapping). Næstu skref felast í að klára að safna eftirfylgdargögnum, fullvinna gögn og birta niðurstöður. Á grunni niðurstaðna verður nýtt meðferðarefni fullgert og klárt til forprófunar.
