Antónía María Gestsdóttir gengst undir meistarapróf í lýðheilsuvísindum og heldur fyrirlestur um verkefni sitt:
Evaluation of school-based mental health promotion for adolescents – focus
on knowledge, stigma, help-seeking behaviour and resources
Meistaraprófsnefnd: Guðrún Bryndís Guðmundsdóttir, Ragnhildur Guðmundsdóttir, Sveinbjörn Kristjánsson og Salbjörg Bjarnadóttir
Prófdómarar: Eiríkur Örn Arnarson og Linda Kristmundsdóttir
Prófstjóri: Arna Hauksdóttir
Allir velkomnir meðan húsrúm leyfir.
Ágrip
Geðrænn vandi barna og unglinga er algengur, um það bil einn af hverjum fimm upplifir eitthvað form tilfinningalegs vanda. Geðheilsuefling hefur verið talin einn af lykilþáttum þess að minnka geðheilsuvanda ungs fólks.
Markmið rannsóknarinnar voru tvö. Hið fyrra var að mæla grundvallar þekkingu, viðhorf, hjálparsækni og bjargráð gagnvart geðheilsuvanda, hjá 111 nemendum í tveimur grunnskólum sem tóku þátt í skólamiðaðri geðheilsu íhlutun. Seinna markmiðið var að meta áhrif íhlutunarinnar á þessa fjóra þætti hjá íhlutunarhóp borið saman við samanburðarhóp.
Lagður var fyrir spurningalisti viku fyrir íhlutun og aftur viku eftir íhlutun og borinn saman við samanburðarhóp (non-equivalent control group). Íhlutunin var stutt fræðsla sem flutt var af einum fagaðila innan geðheilbrigðisþjónustunnar og þremur notendum geðheilbrigðisþjónustunnar. Íhlutunin samanstóð af fræðslu, umræðum og dreifiritum.
Niðurstöður leiddu í ljós að nemendur í skóla A voru með meiri þekkingu á geðröskunum, höfðu jákvæðara viðhorf, og meiri fyrri þekkingu af geðrænum erfiðleikum á forprófi samanborið við jafnaldra sína í skóla B. Áhrif íhlutunarinnar á undirþættina fjóra voru umtalsverð. Þekking, hjálparsækni og bjargráð nemenda í íhlutunarhóp í skóla A jukust marktækt eftir íhlutun. Í skóla B jukust þekking og viðhorf nemenda í íhlutunarhóp marktækt auk þess að jákvæðar breytingar urðu á bjargráðum.
Niðurstöður gefa til kynna að stutt geðheilsufræðsla getur verið áhrifarík til að auka þekkingu unglinga, jákvæð viðhorf þeirra, hjálparsækni og bjargráð gagnvart geðheilsuvanda. Skólayfirvöld ættu að leggja áherslu á að auka heilseflandi geðfræðslu inn í skólana sem hluta af kennsluskrá skólans. Áhersla ætti einnig að vera sett á heildarstefnumótun til að styðja við vellíðan nemenda, foreldra þeirra og starfsfólks skólans.
