Bioblitz í Elliðaárdal - Skordýr og aðrar pöddur
Annars staðar
Rafstöðvarvegur, Elliðaárdal
Í sumar hafa Reykjavíkurborg og Háskóli Íslands slegið höndum saman og stofnað til sérstaks fræðsluverkefnis um lífríki borgarinnar sem heitir Lífveruleit / Bioblitz í Reykjavík. Bioblitz er alþjóðlega þekkt hugtak sem felur í sér þátttöku og samstarf almennings og sérfræðinga með það að markmiði að finna, greina og skrá tegundir dýra, plantna og annarra lífvera á tilteknum svæðum. Þannig safnast gagnlegar og áhugaverðar upplýsingar um útbreiðslu og fjölbreytni líffræðilegrar fjölbreytni en einnig gefst tækifæri fyrir almenning að uppgötva og læra að þekkja lífríkið í sínu nánasta umhverfi.
Fyrst um sinn verður Elliðaárdalurinn í aðalhlutverki og í sumar verður því boðið upp á sérstaka fræðsluviðburði í Elliðaárdal. Sérfræðingar munu leiða viðburðina, veita fróðleik og aðstoða þátttakendur við að finna og greina tegundir og skrá þær. Viðburðirnir verða þrír og mun hver viðburður einblína á tiltekinn lífveruhóp – fyrst plöntur, þá fugla og loks skordýr og önnur smádýr.
Þriðji og seinasti viðburðurinn verður sunnudaginn 23. júlí kl 11. Hist verður við Rafstöðina í Elliðaárdal nálægt nýju hjóla- og göngubrúnni yfir Elliðaárnar. Skordýrum og öðrum smádýrum verður safnað og þau skoðuð og greind eftir bestu getu en mikil tegundafjölbreytni er á þessu svæði.
Opnuð hefur verið sérstök vefsíða á slóðinni www.reykjavikbioblitz.is þar sem þátttakendur geta skráð þær tegundir sem á vegi þeirra verða, skráð staðsetningu og sett inn og skoðað ljósmyndir. Tegundirnar eru flokkaðar í helstu lífveruhópa svo sem plöntur, fugla, spendýr, skordýr o.s.f.v. Vefsíðan er upplögð fyrir áhugasama náttúru- og lífríkisunnendur og er tilvalin fyrir skólahópa til að vinna verkefni um lífverur í nærumhverfinu. Vefsíðan er notendavæn fyrir snjallsíma þ.a. hægt er að setja inn nýjar skráningar á vettvangi.
Nánari upplýsingar má finna á heimasíðu Bioblitz Reykjavík, www.reykjavikbioblitz.is og á Facebook-síðu verkefnisins.
Vertu með í lífveruleit!