Að eldast er viðfangsefni flestra, öldrunarfræði er þverfagleg grein sem skoðar öldrun út frá mismunandi sjónarhornum og áherslum. Öldrunarfræði miðar að því kynna fyrir nemendum helstu þætti sem hafa áhrif á velferðarmál aldraðra, öldrunarþjónustu, stefnumótun, löggjöf og framkvæmd á sviðum félags- og heilbrigðisþjónustu.

Fjallað er um helstu málefni og ágreiningsefni tengd öldrun og öldruðum, s.s. afleiðingar öldrunar,  þætti sem liggja til grundvallar öldrunarferlinu, vellíðan á efri árum, leiðir til að stuðla að heilbrigðri öldrun o.fl.  Þá er lögð sérstök áhersla á að kynna nemendum norræna öldrunarþjónustu og gera þá hæfari til að taka þátt í norrænu rannsóknasamstarfi.

Nám og markmið
Samnorrænt meistaranám í öldrunarfræðum (NordMaG) er 120 eininga þverfaglegt nám sem fer fram í þremur löndum, Finnlandi, Svíþjóð og Íslandi.  Markmið með náminu er að dýpka þekkingu nemenda á málefnum aldraðra og kynna þeim svið öldrunarfræða, kenningar og vinnuaðferðir og gera þá hæfari til að vinna með öðrum starfsstéttum að velferðarmálum aldraðra.

Kennsla
Þverfræðilegt meistaranám í öldrunarfræðum, er skipulagt sameiginlega af Háskóla Íslands, háskólanum í Lundi í Svíþjóð og háskólanum í Jyväskylä í Finnlandi. Í Háskóla Íslands er námið vistað hjá félagsráðgjafardeild, í háskólanum í Lundi innan læknisfræðideildar og í háskólanum í Jyväskylä innan íþrótta- og heilbrigðisvísindadeildar. Nemendur þurfa að taka a.m.k. 30 ECTS við annan hvorn samstarfsskólann.

• Háskóli Íslands - Upplýsingar úr kennsluskrá
• Háskólinn í Jyväskylä
• Háskólinn í Lundi

Atvinnumöguleikar
Að loknu námi í öldrunarfræði hafa einstaklingar styrkt stöðu sína á vinnumarkaði með hagnýtu og fræðilegu námi á sviðum öldrunarfræða. Þeir sem leggja stund á öldrunarfræði koma úr ólíkum starfstéttum, m.a en ekki eingöngu:

• Hjúkrunarfræðingar
• Þroskaþjálfar
• Sjúkraþjálfarar
• Iðjuþjálfar
• Félagsráðgjafar

Hafa samband
Skrifstofa Félagsráðgjafardeildar
Gimli v. Sæmundargötu
Sími: 525-5206
Netfang: felagsradgjof@hi.is