Jarðvísindi fást við jörðina, myndun hennar, mótun og sögu. Fræðigreinin spannar þannig breitt svið, allt frá jöklajarðfræði til eldfjallafræði, jarðskjálft­um til jarðhita, og steingervinga­fræði til haffræði. Jarðvísindin eru ein undirstöðugreina umhverfisvísinda, og skipa öflugan sess innan Háskóla Íslands.

Nám
Grunnnám í jarðvísindum tekur þrjú ár, og ljúka nemendur að minnsta kosti 180 einingum. Innan jarðvísindadeildar HÍ eru tvær námsleiðir:

• Jarðfræði kynnir fyrir nemendum undirstöðuatriði sem varða myndun, byggingu, mótun og sögu jarðar, með áherslu á sérstöðu Íslands. Lögð er áhersla á að nemendur öðlist þekkingu og skilning á samsetningu og uppbyggingu jarðlaga, jarðsögu og þeim ferlum sem móta jörðina. Nemendur kynnast undirgreinum jarðfræðinnar, svo sem  jarðlagafræði, berg- og steindafræði, setlagafræði, eldfjallafræði, jarðhitafræði, jarðsögu og steingervingafræði.
• Jarðeðlisfræði fjallar um eðli, gerð og hegðun jarðarinnar. Í náminu er lögð mikil áhersla á undirstöðugreinar, svo sem stærðfræði og eðlisfræði og er námið að talsverðu leyti sameiginlegt með námi í eðlisfræði. Nemendur taka grunnnámskeið í jarðfræði og kynnast helstu viðfangsefnum og mæliaðferðum jarðeðlisfræðinnar.

Kennsla
Kennsla í jarðvísindum er bæði bókleg og verkleg. Lögð er áhersla á að nemendur kynnist nútímalegum aðferðum, vinnubrögðum og tækjakosti sem beitt er við jarðfræðikortlagningu og könnun á innri gerð jarðar. Lögð er áhersla á vettvangsrannsóknirog námsferðir , en greining sýna og meðferð þeirra fer fram í rannsóknarstofum. Í BS-verkefni sem unnið er að á síðasta námsárinu fá nemendur tækifæri til að beita þekkingu sinni og færni við sjálfstætt rannsóknarverkefni.

Jarðfræði, BS-próf, 180 einingar

Jarðfræði, aukagrein 60 einingar

Atvinnumöguleikar
Jarðvísindamenn eru eftirsóttir sérfræðingar við hvers kyns rannsóknir sem varða jarðefni og nýtingu þeirra (vegagerð, mannvirkjagerð), náttúruvá (eldgos, jarðskjálftar, skriðuföll, snjóflóð, sjávarflóð), nýtingu jarðhita og fallorku, náttúrusögu og umhverfismál, jökla- og loftslagsbreytingar, grunnvatn og haffræði. Þeir starfa jöfnum höndum við opinberar stofnanir (t.d. við háskóla, sveitarfélög, söfn, náttúrufræðistofur, Vegagerðina, Hafrannsóknastofnun) og hjá verkfræðistofum og orkufyrirtækjum. Auk þess vinnur fjöldi jarðvísindafólks við kennslu og ferðaþjónustu.

Húsnæði
Bókleg kennsla fer að mestu leyti fram í Öskju, en þar hefur Jarðvísindadeild aðsetur. Verkleg kennsla fer fram í Öskju, VRI og VR-II.

Félagslíf
Nemendafélag jarðvísindanema heitir Fjallið, og heldur það uppi mjög öflugu félagsstarfi nemenda, skipuleggur ferðir og útgáfur.

Hafa samband
Kennslustjóri grunnnáms í jarðvísindum er Jón Ólafsson (jo@hi.is, jon@hafro.is). Hann hefur aðsetur í skrifstofu 233 í Öskju, og síminn er 525-4748.