Meistaranám í umhverfis- og auðlindafræðum er spennandi 120 ECTS eininga rannsóknatengt nám sem miðast við tvö ár. Námið er kjörinn valkostur fyrir fólk sem lokið hefur BS- eða BA-gráðu og hefur áhuga á að breikka þekkingargrunn sinn, auka starfsmöguleika í framtíðinni, sem og að auka færni í að takast á við vandamál og verkefni á sviðum umhverfis- og auðlindafræða. Þekking sú sem nemendur öðlast gerir þeim kleift að vinna þvert á fagmúra og sjá viðfangsefni sín í víðara samhengi en gengur og gerist innan hefðbundinna fræðigreina. Að námi loknu útskrifast nemendur með MS- eða MA-gráðu í umhverfis- og auðlindafræðum.

Starfsvettvangur að námi loknu er mjög fjölbreyttur, svo sem í ráðgjöf á sviði umhverfis- og orkumála, hjá fyrirtækjum með virka umhverfisstefnu, í stjórnsýslu á sveitarstjórnarsviði og landsvísu, við rannsóknir hjá stofnunum og einkaaðilum, við fjölmiðla og við kennslu.

Bæklingur á ensku um námið (pdf)

Einstakt námstækifæri í alþjóðlegu umhverfi  

Allir nemendur ljúka ákveðnum kjarnanámskeiðum sem gefa sameiginlegan breiðan grunn í umhverfisvísindum, auðlindastjórnun, hugmyndafræði, stefnumótun og ákvarðanatöku, siðfræði náttúrunnar og umhverfisstjórnun fyrirtækja. Síðan eru valnámskeið í boði innan flestra deilda Háskóla Íslands, en hin faglega breidd skólans býður upp á að móta sérhæfingu á sviði umhverfis- og auðlindafræða sem hentar hverjum og einum nemanda.

Öll kjarnanámskeið eru kennd á ensku, sem og hluti valnámskeiða, og hljóta því nemendur góða þjálfun í að tjá sig á enskri tungu, bæði í ræðu og riti. Bakgrunnur nemenda er auk þess sérlega fjölbreyttur, bæði hvað varðar grunngráðu og þjóðerni. Nemendafélag námsbrautarinnar, Gaia, heldur uppi öflugu fræðslu- og félagsstarfi.