Háskóli Íslands býður nám á þremur námsstigum:

• Þriggja ára grunnnám sem leiðir til bakkalárgráðu (BA- eða BS-gráðu).
• Tveggja ára framhaldsnám sem leiðir til meistaragráðu (MA-, MS- eða M.Ed.-gráðu).
• Þriggja ára doktorsnám (til Ph.D.- eða Ed.D.-gráðu).

Í stöku tilfellum er uppbygging náms með öðrum hætti, t.d. í læknis- og tannlæknisfræði, þar sem grunnnámið er sex ár og leiðir til kandídatsprófs og í sjúkraþjálfun og hjúkrunarfræði þar sem grunnnámið er fjögur ár.

Fullt nám í eitt kennsluár er metið til 60 ECTS eininga, 30 á hvoru misseri. Sjá nánari upplýsingar um vægi eininga Háskólans undir Námsmat.

Í kennsluskrá og á vefjum deilda er að finna ítarlegar upplýsingar um námsframboð og námsleiðir, auk ýmissa annarra námstengdra upplýsinga.

Tungumál

Kennsla fer fyrst og fremst fram á íslensku. Í mörgum deildum eru þó í boði námskeið kennd á ensku og fer þeim fjölgandi.

Fjarnám

Háskólinn býður upp á fjölbreytta möguleika í fjarnámi, bæði á grunn- og framhaldsstigi. Sjá upplýsingasíðu um fjarnám.

Aðgangur að innri vef og netkerfi Háskólans

Skráðir nemendur í Háskóla Íslands fá úthlutað notendanafni og lykilorði að Uglu, innra vefkerfi Háskólans. Aðgangi að Uglu fylgir aðgangur að heimasíðum þeirra námskeiða sem nemandi er skráður í en heimasíður námskeiða eru mikilvæg upplýsingaveita kennara sem miðla þar námsefni og ýmsum námstengdum upplýsingum. Nemandi fær einnig eigin skjalageymslu, netsvæði og netfang. Tekið er öryggisafrit af skjalageymslu nemenda einu sinni á sólarhring. Því er nemendum, öryggisins vegna, ráðlagt að geyma skjöl sín í skjalageymslu Uglu. Skjölin er hægt að nálgast í gegnum nettengingu hvaðan sem er. Sjá nánari upplýsingar um Uglu og tölvuþjónustu Háskólans á síðunni Tölvuþjónusta - og í kennsluskrá.