| Háskóli Íslands

Brynhildur Davíðsdóttir, dósent við Háskóla Íslands

Brynhildur Davíðsdóttir fjallar hér um sjálfbærni og sýnir hvernig auðlindir náttúrunnar eru okkur aðgengilegar í hagrænu ljósi. Hún bendir á hversu mikilvægt það er fyrir mannkynið að taka upp sjálfbæra þróun til að tryggja velferð í framtíðinni. Erindi Brynhildar sýnir hvernig náttúran býður okkur þjónustu sína með ýmsum hætti í hringrás framboðs og eftirspurnar fyrirtækja og heimilanna.

Gylfi Zoëga, prófessor í hagfræði

Gylfi Zoëga fjallar hér um möguleg tækifæri í Kreppunni. Nokkur bjartsýni einkennir mál Gylfa en hæfni hans og þekking hefur verið notuð ríkulega af fjölmiðlum síðasta kastið við að veita landsmönnum sýn á það sem er að gerast í efnahagskerfi þjóðarinnar. Gylfi talar umbúðalausa og kjarnyrta íslensku sem hann skreytir með fágætri kímni og er með læknisfræðifléttaða greiningu á íslensku krónunni til að mæta hagfræðilegum undirtóninum í erindi geðlæknisins Engilberts. Sjáðu grafið sem Gylfi kallar hjartalínurit krónunnar.

Kristín Ingólfsdóttir, rektor Háskóla Íslands

Kristín flytur inngang að Mannlífi og kreppum og þakkar stuðningsaðilum átaksins. Helstu styrktaraðilar verkefnisins eru Alcan á Íslandi, Brim, Frumtök og Össur. Actavis styrkir einnig fyrirlestra um heilsutengd málefni. Allir fyrirlesarar gáfu vinnu sína. Styrkir eru nýttir til upptöku kvikmyndafyrirtækisins Kukls ehf. í útsendingargæðum á netinu. Engilbert og Kristín völdu fyrirlesara. Hver fyrirlestur er stuttur, varir frá 15 og upp í 23 mínútur.

Guðrún Nordal, forstöðumaður stofnunar Árna Magnússonar

Guðrún Nordal tíundar hér hvernig fíkn ungra karlmanna í völd og fé réð miklu um fall í íslensku samfélagi í tíð Sturlunga. Þetta þykir mörgum ríma óþægilega við fjölda atburða í nútímanum. Þótt Guðrún fjalli hér um býsna alvarleg mál er erindi hennar launfyndið og stórskemmtilegt.

Björg Thorarensen, forseti Lagadeildar HÍ

Björg Thorarensen ræðir hér lýðræðið og stjórnarskrána í gríðarlega fróðlegu erindi. Björg ræðir meðal annars mikilvægi stjórnlagaþings og einnig það hvernig núverandi stjórnarskrá hefur reynst við að mæta vandanum sem fylgt hefur kreppunni. Björg ræðir kosti þess að Íslendingar fái nýja stjórnarskrá sem tekur betur á því gjörningaveðri sem glímt er við í samtímanum.

Soffía Gísladóttir, forstöðumaður Vinnumálastofnunar Norðurlands eystra

Soffía fjallar um uppbyggingu og samhæfingu þjónustu fyrir einstaklinga í atvinnuleit. Erindi hennar er hrífandi og snjallt. Hún varpar upp fallegum myndum sem hún nýtir til að sýna hvernig Vinnumálastofnun á Norðurlandi eystra hefur með framsækni bætt mannlíf í landshlutanum.

Engilbert Sigurðsson, geðlæknir

Engilbert sýnir þér hér með hvaða hætti þessi fullyrðing á við í íslenskum samtíma en hugmyndin kom í málshætti úr páskaeggi. Erindi Engilberts birtir sýn geðlæknisins á öldurót hagsveiflna síðustu áratuga og er því á köflum skemmtilega hagfræðiskotið. Hlustaðu á stórsnjalla dæmisögu úr reynsluheimi Engilberts sem varpar ljósi á ástandið í samfélaginu í dag. Engilbert fór fyrir ekki svo löngu í hálendisferð með öðrum lækni sem tók upp á því að veikjast í ferðinni þegar síst skyldi. Heyrðu hvernig fór hjá þeim félögunum og hvaða lærdóm má draga af því.

Gylfi Magnússon, dósent í hagfræði

Viltu vita næstum allt um kosti okkar í gjaldeyrismálum. Skoðaðu þá þennan fyrirlestur Gylfa Magnússonar, dósents í hagfræði. Hann fjallar ýtarlega um myntmálin og rekur afar sveiflukennda gengissögu íslensku krónunnar. Óhætt er að fullyrða að allir verði margs vísari um kosti þess og galla að taka upp Evru í framhaldi af því að horfa á þetta erindi Gylfa. Öllum helstu leiðum er lýst með skýrum dæmum um kosti og galla hverrar leiðar.

Gylfi Dalmann, dósent og vinnumarkaðsfræðingur

Fylgir eitthvað hagfræðigen nafninu Gylfi? Gylfi Dalmann flytur snjallt erindi um kreppuna á vinnumarkaði. Hér sýnir hann nokkur dæmi um það hvernig sveigjanleiki íslensks vinnumarkaðar getur komið í veg fyrir langvinnt atvinnuleysi. Gylfi Dalmann kemur sér beint að efninu og er rausnarlegur á kímni sem hann fléttar saman við þá alvöru sem viðfangsefnið vissulega er. Gylfi Dalmann er raunar ekki mjög svartsýnn fyrir hönd Íslendinga líkt og nafnar hans tveir.

Páll Matthíasson geðlæknir

Geðlæknirinn Páll fjallar um hamingjuna frá ýmsum hliðum. Erindið tengir niðurstöður rannsókna og mannlíf í mörgum löndum jarðarkringlunnar saman af kímni og frásagnargáfu. Engilbert stallbróðir Páls, sem stýrði ráðstefnunni Mannlíf og kreppur af mikilli röggsemi, sagði í hálfkæringi að erindi Páls hefði engrar athygli notið, fyrr en eftir bankahrunið að menn virtust hafa farið að gefa vaxandi gaum að öðrum gildum en þeim sem tengjast peningum og einstaklingshyggju.

Innri vefir