Lýðheilsuvísindi við Háskóla Íslands er þverfræðilegt framhaldsnám sem miðar að aukinni þekkingu á heilsu og heilsueflandi aðgerðum. Námið er vettvangur vandaðra rannsókna á heilsufari og áhrifavöldum þess og er góður undirbúningur fyrir þá sem vilja leiða heilsueflingarstarf á eigin starfsvettvangi, ætla sér leiðtogahlutverk á hinum fjölmörgu sviðum heilbrigðismála eða vilja helga sig rannsóknum á sviðum lýðheilsu.

Samstarfsaðilar Námsbrautar í lýðheilsuvísindum og kennarar námsins koma frá innlendum og erlendum stofnunum sem eru í fararbroddi á sínum sviðum.  Þetta gerir Háskóla Íslands kleift að bjóða upp á einstakt nám og tækifæri til rannsókna.

Breidd Háskóla Íslands gerir nemendum kleift að velja úr miklum fjölda valnámskeiða og móta þannig námið og rannsóknarefni í átt að sínu áhugasviði. Nemendur hafa einnig kost á að taka námskeið við erlenda samstarfsháskóla og stunda rannsóknir á eigin vinnustöðum eða við innlendar samstarfsstofnanir.

Þekkingarsköpun - forvarnir og heilsuefling

Markmið lýðheilsuvísinda við Háskóla Íslands er að tengja saman vandað framhaldsnám og rannsóknir á sviðum lýðheilsu og að birta niðurstöður þessara rannsókna í viðurkenndum vísindatímaritum á alþjóðavettvangi.