Táknmálsfræði er bæði kennd sem aðalgrein og aukagrein. Einnig er boðið upp á nám í táknmálstúlkun. Markmiðið með táknmálsfræðum er annars vegar að búa nemendur undir rannsóknir á táknmáli og stöðu heyrnarlausra og heyrnarskertra og hins vegar að renna fræðilegum stoðum undir starf táknmálstúlka.

Kennsluhættir
Kennsla fer fram á íslensku og íslensku táknmáli. Þar sem táknmál hefur ekki ritmál er erfitt að tileinka sér það í sjálfsnámi. Þetta gerir það að verkum að í nokkrum námskeiðum innan táknmálsfræðinnar er nauðsynlegt að hafa mætingarskyldu.

Í námslýsingu í kennsluskrá er gefið upp ef um mætingarskyldu er að ræða. Lágmarksmætingarskylda er forsenda þess að stúdent öðlist próftökurétt.

Stúdentum sem lesa táknmálsfræði sem aukagrein til BA-prófs (60 einingar) er skylt að taka námskeiðin TÁK102G, TÁK103G, TÁK104G, TÁK201G, TÁK202G, TÁK203G og TÁK105G (nema þeir sem hafa lokið sambærilegu námskeiði). Önnur námskeið eru valin úr táknmálsfræði í samráði við umsjónarmann námsins.

Stúdentum sem lesa táknmálsfræði sem aðalgrein með aukagrein til BA-prófs (120 einingar) er skylt að taka öll námskeið á fyrsta námsári. Á öðru námsári þurfa stúdentar að taka námskeiðin TÁK302G, TÁK303G, TÁK403G auk BA-ritgerðar, 10 einingar að auki innan táknmálsfræðinnar og 10 einingar í valnámskeiðum (má vera námskeið innan táknmálsfræðinnar).  Ath. að námskeið á öðru námsári eru ekki kennd árlega.

Stúdentum sem lesa táknmálsfræði sem aðalgrein án aukagreinar til BA-prófs (180 einingar) og ljúka þar með námi í táknmálsfræði og táknmálstúlkun er skylt að ljúka öllum 180 einingunum sem kenndar eru innan táknmálsfræðinnar. Forsenda þess að geta hafið nám í táknmálstúlkun er að stúdent hafi lokið öllum námskeiðum á fyrsta og öðru námsári. 

Nám í táknmálstúlkun
Nám í táknmálstúlkun er í boði þriðja hvert ár, næst skólaárið 2012-2013. Til að geta stundað það nám skulu nemendur hafa lokið 120 einingum í táknmálsfræði og vera með fyrstu einkunn að meðaltali úr færninámskeiðunum fjórum. Önnur inntökuskilyrði eru ákveðin hverju sinni og geta breyst á milli ára.

Athugið! Nám í táknmálstúlkun er í boði þriðja hvert ár. Námskeið á öðru námsári eru að jafnaði ekki í boði það skólaár sem kennd eru námskeið í táknmálstúlkun.

Hagnýtt gildi
Rannsóknir á íslenska táknmálinu og menningu og sögu heyrnarlausra á Íslandi eru mjög stutt á veg komnar. Því er þörf fyrir fólk með fjölbreytta menntun í bland við menntun í táknmálsfræði. Mikil þörf er á táknmálstúlkum en einnig fólki sem getur starfað við rannsóknir eða kennslu á táknmáli, námsefnisgerð í táknmáli og öðrum fögum fyrir heyrnarlausa o.fl. Táknmálsfræði má því bæði stunda eina sér og í bland við fjölmargar aðrar greinar eins og íslensku, málvísindi, kennslufræði, félagsfræði, mannfræði og sálfræði svo eitthvað sé nefnt. Fólk með aðra menntun, eins og lögfræðingar, læknar, fólk í þjónustu o.s.frv., getur líka aukið starfsmöguleika sína með því að bæta við sig kunnáttu í íslensku táknmáli.

Félagslíf
Nemendafélag táknmálsfræðinema heitir Hending. Félag táknmálsfræðinema. Félagið er með síðu á Facebook.

Húsnæði
Kennsla í táknmálsfræði fer aðallega fram í Aðalbyggingu, en einhver námskeið eru kennd að hluta eða að öllu leyti í öðrum byggingum, þeirra á meðal Nýja-Garði, í Tungumálamiðstöð.

Hafðu samband
Skrifstofa Hugvísindasviðs
Aðalbygging, 3. hæð v/ Suðurgötu
101 Reykjavík
hug@hi.i
Sími 525 4400

Verkefnastjóri deildar: Jóhanna María Vilhelmsdóttir, jovil@hi.is

Verkefnastjóri alþjóðamála: Guðrún Birgisdóttir, gb@hi.is

Síða uppfærð / breytt 25. nóvember 2010