BA-nám í íslensku sem öðru máli. Þessi leið er einkum ætluð þeim sem hafa fræðilegan áhuga á íslensku máli, íslenskum bókmenntum og menningu.

Hagnýtt nám í íslensku sem öðru máli. Þessi námsleið, eða einstök námskeið úr henni, er einnig hentug fyrir skiptistúdenta úr öðrum námsgreinum.   

Ekki er hægt að fá námskeið metin á milli námsleiða.

Um námið
Íslenska sem annað mál er kennd til BA-gráðu sem aðalgrein (til 120 eininga eða 180 eininga) og aukagrein (til 60 eininga). BA-nám tekur að jafnaði þrjú ár. Auk almennra inntökuskilyrða (erlends ígildis íslensks stúdentsprófs) þurfa stúdentar að standast lágmarkskröfur á stöðuprófi sem haldið er við upphaf hvers skólaárs. Færnikröfur miðast við Icelandic Online 1, sjálfsnámsefni sem opið er á Netinu. Nýir stúdentar sem hafa auk áskilinna færnikrafna góða undirstöðu í íslensku máli geta þreytt haust- og vormisserispróf fyrsta árs, átta að tölu, við upphaf haustmisseris. Þeir sem standast þessi próf geta hafið nám á öðru námsári.

Hagnýtt nám í íslensku sem öðru máli er ársnám fyrir byrjendur til 60 eininga sem veitir diplómaskírteini. Inntökuskilyrði er erlent ígildi íslensks stúdentsprófs.

Markmið
Markmið íslenskunámsins eru m.a.:

• að nemendur tileinki sér gagnrýnið sjónarhorn og átti sig á stöðu og gildi íslenskra bókmennta og íslensks máls í nútímasamfélagi;
• að nemendur fái skýra yfirsýn yfir íslenska bókmenntasögu frá upphafi til nútímans, þekkir helstu bókmenntagreinar og öðlist víðtæka þekkingu og skilning á völdum sviðum bókmenntanna;
• að nemendur fái góða yfirsýn yfir íslenskt málkerfi bæði að fornu og nýju, átti sig á helstu málbreytingum sem orðið hafa og eru í gangi, og öðlist víðtæka þekkingu og skilning á völdum sviðum málsins;
• að nemendur öðlist þekkingu og gagnrýninn skilning á ólíkum sjónarmiðum og kenningum sem nýtast við rannsóknir á íslensku máli og bókmenntum;
• að nemendur þekki fjölbreyttar rannsóknaraðferðir í bókmenntum og málvísindum og geti beitt þeim á sjálfstæðan hátt.

Kröfur
Inntökuskilyrði í íslensku eru stúdentspróf af bóknámsbraut. Nauðsynlegt er að nemendur hafi gott vald á íslensku, bæði töluðu máli og rituðu. Mikilvægt er að þeir séu vel læsir á ensku og Norðurlandamál, en einnig er mjög æskilegt að geta lesið texta á þýsku og/eða frönsku. Kunnátta í latínu getur komið sér vel, einkum við rannsóknir á fornu máli og bókmenntum.

Kennsluhættir og námstilhögun
Kennsla í íslensku fer fram í fyrirlestrum og umræðutímum. Einnig eru heimaverkefni og ritgerðir mikilvægur þáttur kennslunnar í flestum námskeiðum. Tímasókn er ekki ýkja mikil en nemendur verða að gera ráð fyrir mikilli heimavinnu og því eru sjálfstæð og öguð vinnubrögð forsenda góðs gengis í náminu. Námsmat er fjölbreytt og getur falist í skriflegum og munnlegum prófum,  framsögu í tímum, ritgerðum, heimaverkefnum o.fl.

Samval með öðrum greinum
Hverjum nemanda gefst kostur á að haga náminu að nokkru leyti eftir áhugasviði sínu og framtíðaráætlunum. Samvinna við aðrar kennslugreinar gerir það að verkum að nemendum standa til boða valnámskeið í almennri bókmenntafræði, almennum málvísindum, sagnfræði, þjóðfræði og fleiri greinum. Með aðalgreininni íslensku er enn fremur hægt að velja sem aukagrein aðra kennslugrein á Hugvísindasviði eða jafnvel grein af öðrum sviðum Háskólans. Þannig getur hver nemandi lagað námið að áhugamálum sínum.

Hagnýtt gildi
Grunnnám í íslensku veitir haldgóða almenna menntun og býr nemendur undir margs konar störf. Fólk með háskólamenntun í íslensku fæst við kennslu á öllum skólastigum og við fræðistörf, m.a. á rannsóknastofnunum á sviði íslenskra fræða. Margir leggja fyrir sig ritstörf eða önnur störf á sviði menningar og lista, fjölmiðlun af ýmsu tagi og útgáfustörf (sem fréttamenn, blaðamenn, ritstjórar, málfarsráðgjafar, bókmenntarýnar o.s.frv.). Menntunin kemur að góðum notum í öllum þeim störfum þar sem gott vald á íslensku máli og þekking á íslenskum bókmenntum og menningu er nauðsynleg.

Félagslíf
Félag íslenskunema, Mímir, stendur fyrir umfangsmiklu starfi á sviði fræða og skemmtanalífs. Félagið heldur árlegt Mímisþing þar sem nemendur flytja fræðileg erindi. Það gengst einnig fyrir bókmenntakynningum og annarri menningarstarfsemi. Auk þess heldur Mímir árshátíð, stendur fyrir haust- og vorferð, vísindaferðum í stofnanir og fyrirtæki, heldur árshátíð og árlegt kraptakvöld, og fleira mætti nefna.
 
Húsnæði
Kennsla í íslensku fer aðallega fram í Árnagarði og þar eru skrifstofur allra fastra kennara greinarinnar. Þar rekur Félagsstofnun stúdenta kaffistofu sem er mikilvægur samkomustaður. Mímir hefur einnig aðstöðu í húsinu. Lesaðstaða er í Gimli og Þjóðarbókhlöðu, auk þess sem framhaldsnemar hafa lesaðstöðu í Árnagarði.

Greinarformaður 2010-2012:
Jón Karl Helgason
Sími: 525 5238, netfang: jkh@hi.is, uni.hi.is/jkh
Skrifstofa: Árnagarður, herbergi 307

Hafðu samband
Skrifstofa Hugvísindasviðs
Aðalbygging, 3. hæð v/ Suðurgötu
101 Reykjavík
hug@hi.i
Sími 525 4400

Verkefnastjóri deildar: Jóhanna María Vilhelmsdóttir, jovil@hi.is

Verkefnastjóri alþjóðamála: Guðrún Birgisdóttir, gb@hi.is

Síða uppfærð / breytt 3. janúar 2011