Tannlæknadeild er lítil og persónuleg og býður nemendum upp á faglegt og krefjandi nám í tannlæknisfræðum, þar sem lausnarleitarnám er haft að leiðarljósi og nemendur hvattir til dáða.

Nám í tannlæknisfræði hefur það að meginmarkmiði að mennta nemendur í tann- og munnvísindum og stuðla þannig að bættri munn- og tannheilsu þjóðarinnar. Námið tekur 6 ár og lýkur með kandidatsprófi í tannlækningum (Cand.odont-próf).  Á 1. og 2. ári stunda nemar nám í undirstöðugreinum tannlæknisfræðinnar.  Á 3. ári er lögð áhersla á verklegar æfingar og á 4. - 6. ári er megináherslan á vinnu með sjúklinga sem fram fer á aðgerðastofu deildarinnar. Nemendur verða að taka þátt í öllum verklegum æfingum og standa skil á verkefnum.

Tannlæknisfræði er einungis hægt að stunda sem aðalgrein. Námið er alls 360 einingar. Í desember að loknu 1. misseri 1. árs er haldið samkeppnispróf. Sjá nánar í upplýsingum um inntökuskilyrði.

Nemendur geta tekið rannsóknarverkefni sem valgrein undir stjórn umsjónarkennara.  Einingar eru breytilegar.

Upplýsingar um tannlæknisfræði í kennsluskrá