Lyfjafræði er fræðigrein sem fjallar um lyf frá öllum hugsanlegum sjónarhornum, allt frá þróun nýrra lyfjaefna og lyfjaforma, að framleiðslu, notkun og verkun lyfjanna. Nám í lyfjafræði er fjölbreytt, samsett af bóklegri og verklegri kennslu í hinum ýmsu greinum líf- og raunvísinda, auk félagsvísindagreina.

Kennsla fer fram með fyrirlestrum og verklegum æfingum, einstaklingsbundnum æfingum og hópæfingum, dæmatímum og umræðutímum, lögð áherslu á kennsluhætti sem stuðla að því að virkja sjálfstæði og frumkvæði nemenda.

Námsleiðir í boði:

Aðstaða nemenda

Nemendur hafa aðstöðu á 1. hæð í Haga, þar sem þeir hafa aðgang að lesrými og tölvuveri, auk eldhúss og sjoppu, sem rekin er af nemendum. Einnig er þar ljósritunarvél í eigu Tinktúru - félags lyfjafræðinema. Eins og aðrir nemendur við Háskóla Íslands hafa lyfjafræðinemar aðgang að almennum lesrýmum og tölvuverðum víða á háskólasvæðinu, m.a. í Þjóðarbókhlöðu og á Háskólatorgi, auk annarrar þjónustu, og má þar sem dæmi nefna matsöluna Hámu, og Náms- og starfsráðgjöf.

Kennsla fer að mestu fram í Haga við Hofsvallagötu en nemendur á fyrsta og öðru námsári sækja einnig tíma með nemendum á Verkfræði- og náttúruvísindasviði og fer sú kennsla fram víða á háskólasvæðinu.

Í Haga eru tvær kennslustofur. Í báðum kennslustofunum er nettenging, tölva og skjávarpi. Einnig nýtir Lyfjafræðideild, ásamt fleiri deildum, kennslustofur að Neshaga 16, sem er næsta hús við Haga.

Í Haga eru þrjár rannsóknastofur fyrir verklega kennslu, auk smærri rannsóknarstofa þar sem kennarar deildarinnar, auk meistara- og doktorsnema, vinna rannsóknarverkefni sín.