Vísindavefur HÍ fagnar 10 ára afmæli
Á þessu ári fagnar Vísindavefur Háskóla Íslands 10 ára afmæli og verður afmælisárinu fagnað með ýmsum hætti.
Á sjálfan afmælisdaginn, 29. janúar,verður haldið málþing um vísindamiðlun frá ólíkum sjónarhornum.
Í kjölfarið fylgir fjögurra fyrirlestra röð fyrir almenning: Vísindaeyjan: Landnám, loftslag og haf. Þar verður meðal annars sagt frá landnámi á úthafseyjum, breytingum á landslagi Íslands vegna bráðnunar jökla og hvaða stefnu loftslagsmál í heiminum munu taka á næstunni.
Í marsmánuði verður haldið áfram með árlega fyrirlestraröð sem er sérstaklega ætluð fjölskyldufólki: Vísindi á verði bíóferðar.
Nokkrar nýjungar verða kynntar á afmælisárinu. Meðal annars er stefnt að því að notendur geti sótt sér svör með hlaðvarpi (podcast) og eins er ætlunin að gera stuttar myndir sem notendur geta horft á, hvort sem er á YouTube eða Vísindavefnum.
Þriggja ára Evrópuverkefni Vísindavefsins lýkur á afmælisárinu. Í verkefninu var skoðað hvernig best er að miðla vísindum á Netinu til barna og unglinga.
Á síðasta ári heimsótti rúmlega 1 milljón manns Vísindavefinn og fletti þar rúmlega 2.3 milljónum síðna. Á meðal þeirra spurninga sem lesendur fengu svar við má nefna, hvernig myndast öldur á hafinu, hvernig verka rafhlöður í farsímum, hvaða afleiðingar hafa pólskipti fyrir lífið á jörðinni, eru til vísindalegar útskýringar á Nóaflóðinu og hvernig er hægt að berja eitthvað augum?
Hlutverk Vísindavefsins er að miðla vísindum til almennings og frá því vefurinn var stofnaður hafa birst um 8200 svör um vísindi við spurningum frá almenningi. Alls hafa um 800 höfundar svarað spurningunum.
25.1.2010 12:49
