Tímarit Háskóla Íslands er komið út
Tímarit Háskóla Íslands er komið út, troðfullt af greinum um vísindarannsóknir nemenda við HÍ. Ritið er ljómandi lesning fyrir þá sem vilja nálgast fræðandi og fjörlegt efni um það öfluga vísindastarf sem fram fer við HÍ.
Í ritinu, sem er 100 blaðsíður að lengd, er fjallað um fræðslustarf í fangelsum, hopandi jökla, hæfileika presta, undrun útlendinga yfir íslenskri náttúru – VÁ!!!, geðlyfjanotkun barna á Íslandi sem þykir meiri hér en hjá nágrannaþjóðum okkar.
Fjallað er um nýja tækni til varnar tannskemmdum, facebook er skoðuð frá nýju sjónarhorni og sjónum beint að kríum í kreppu. Þá er sjónum beint að mataræði, offitu og auðvitað hreyfingu, sem meðal annars seinkar öldrun og bætir líðan grunnskólabarna.
Óttinn í pólitík er í fókus í tímaritinu, netógnin, hrunið, brandarar tengdir hruninu, samningahegðun Íslendinga og svo Burðarvakinn, sem fækkar svo um munar óvissuferðunum í fjósið.
Margar spennandi greinar eru um nýsköpunarfyrirtæki sem eru sprottin í HÍ. Fjallað er um fyrirtækið Clara sem finnur nálina í heystakknum, gítarstilli sem hefur slegið í gegn hjá Nokia og svo er viðtal við dúxinn sem kastar spjótinu kvenna lengst.
Í tímaritinu er líka spáð í hvort hvalirnir tali íslensku og rætt er við stúdent sem kortleggur alheiminn og annan sem vill vinna bug á sumarexemi í íslenska hestinum.
Þetta er bara brot af því efni sem er í tímaritinu.
Hægt er að óska eftir því að fá Tímaritið sent í pósti með því að senda tölvupóst á hi@hi.is, en blaðið liggur einnig frammi á Háskólatorgi.
Tímaritið má einnig lesa á tölvutæku formi með því að smella hér:
http://www.hi.is/files/skjol/stjornsysla/markads_og_samskiptasvid/kynnin...
26.2.2010 15:53
