Háskóladagurinn er laugardaginn 20. febrúar - Allt grunnnám við HÍ kynnt
Hinn árlegi Háskóladagur er laugardaginn 20. febrúar nk. Þá kynnir Háskóli Íslands ásamt öllum öðrum háskólum á landinu það nám sem fólki stendur til boða á næsta skólaári.
Allt framboð í grunnnámi við HÍ verður kynnt á milli klukkan 11 og 16 í Háskólatorgi, Odda og Gimli. Einnig verður kynnt ýmis þjónusta sem stendur nemum HÍ til boða, félagslíf og fleira.
Fræðasvið Háskóla Íslands eru fimm: Félagsvísindasvið, Heilbrigðisvísindasvið, Hugvísindasvið, Menntavísindasvið og Verkfræði- og náttúruvísindasvið. Deildirnar eru 25 og námsleiðirnar skipta hundruðum. Námsframboðið er því mjög fjölbreytt og námskynningin er kjörinn vettvangur fyrir þá sem hyggja á nám við HÍ að kynna sér hvaða möguleikar eru í boði.
Fulltrúar deilda, bæði nemendur og kennarar, verða á svæðinu og geta svarað spurningum sem brenna á gestum. Einnig verður hægt að nálgast kynningarbæklinga, skoða háskólasvæðið og njóta skemmtiatriða.
Nánari upplýsingar um námskynninguna og námsframboðið er hér:
Aðrir íslenskir háskólar verða með kynningu í Ráðhúsi Reykjavíkur en þar verða Háskólinn á Akureyri – Háskólinn á Bifröst – Háskólinn á Hólum - Háskólinn í Reykjavík – Landbúnaðarháskóli Íslands og Listaháskóli Íslands Í Norræna húsinu munu Norrænir háskólar standa að kynningu á sínum námsmöguleikum.
Stúdentsefni og allir þeir sem hafa áhuga á að kynna sér möguleikana í háskólanámi, geta þannig auðveldlega gengið á milli þeirra staða þar sem námsmöguleikanir verða kynntir.
Námskynningar munu einnig verða á landsbyggðinni en þær verða á eftirfarandi stöðum: 2. mars Menntaskólanum á Egilsstöðum 3. mars Verkmenntaskólanum á Akureyri 10. mars Menntaskólanum á Ísafirði Námskynningarnar eru öllum opnar.
5.2.2010 15:40
