Einar Mäntylä gestadósent við Lyfjafræðideild
Þann 30. apríl sl. var undirritaður samningur á milli Lyfjafræðideildar Heilbrigðisvísindasviðs Háskóla Íslands og Dr. Einars Mäntylä um gestadósentstöðu við Lyfjafræðideild. Markmið samningsins er að styrkja kennslu og rannsóknir í lyfjafræði og skyldum greinum við Háskóla Íslands.
Á gildistíma samningsins, sem gerður er til 31. júlí 2014, munu Lyfjafræðideild og Einar m.a. hafa samstarf um rannsóknir auk þess sem Einar mun koma að kennslu á grunn- og framhaldsstigi, og leiðbeina nemendum í rannsóknaverkefnum.
Dr. Einar Mäntylä er fæddur 1963. Hann lauk BS-prófi í líffræði frá Háskóla Íslands 1988 og doktorsprófi í plöntusameindaerfðafræði frá Landbúnaðarháskólanum í Uppsölum, Svíþjóð 1997. Eftir tvö ár sem nýdoktor í Svíþjóð fluttist Einar til Íslands og byggði m.a. upp aðstöðu til rannsókna í plöntulíftækni við Rannsóknastofnun Landbúnaðarins að Keldnaholti. Árið 2000 stofnaði Einar ásamt nokkrum félögum fyrirtækið ORF Líftækni sem hefur verið mjög virkt í rannsóknum og tækniþróun og er í örum vexti. Fyrirtækið fæst við framleiðslu verðmætra próteina í byggi, sem eru m.a. notuð til rannsókna í líf- og læknisvísindum, í snyrtivörur og í lyfjaiðnaði. Einar veitir forstöðu vísindasamvinnu- og hugverkadeild fyrirtækisins.
8.5.2009 15:38
