Bjartsýnir Gylfar og fullt út úr dyrum á Mannlífi og kreppum

Fullt var út úr dyrum í Hringstofu í Háskólatorgi í dag þegar fyrsti hlutinn í fyrirlestraröðinni Mannlíf og kreppur fór þar fram. Markmið fyrirlestranna er að fræða ungt fólk á Íslandi um stærsta mál samtímans hér á landi, fjármálakreppuna, og líkleg áhrif hennar á innviði íslensks samfélags á næstu árum. Kristín Ingólfsdóttir, rektor Háskóla Íslands, ýtti fyrirlestraröðinni úr vör en í kjölfar hennar talaði Engilbert Sigurðsson geðlæknir. Kveikjan að fyrirlestri hans var málsháttur sem hann fékk í páskaeggi.

"Það þarf sterk bein til að þola góða daga," var yfirskriftin og Engilbert sýndi hlustendum með hvaða hætti þessi fullyrðing á við í íslenskum samtíma. Erindi Engilberts var á köflum hagfræðiskotið en hann lauk fyrirlestri sínum með stórsnjallri dæmisögu sem hann greip úr eigin reynsluheimi. Engilbert fór fyrir ekki svo löngu í hálendisferð með öðrum lækni sem tók upp á því að veikjast í ferðinni þegar síst skyldi. Það voru hæg heimatökin og læknirinn sem veiktist sjúkdómsgreindi sjálfan sig og miðað við einkennin virtist fátt annað til ráða en að kalla út þyrlu Landhelgisgæslunnar. Þegar öllu var á botninn hvolft rénaði sóttin og greiningin reyndist ekki á rökum reist. Engilbert benti á að það hentaði læknum betur að greina sjúkdóma annarra en sína eigin og það sama ætti við um afar marga í þeirri kreppu sem nú væri geisandi.

Engilbert er hugmyndasmiðurinn að baki fyrirlestraröðinni og var hann þaulspurður í framhaldi af erindi sínu eins og aðrir sem tóku til máls. Fyrirlestur Engilberts, og annarra, var tekinn upp af reynsluboltum frá Kukli ehf. en að lokinni myndvinnslu verða öll erindin aðgengileg á vefsvæði HÍ.

Næstur tók til máls Gylfi Zoëga, prófessor í hagfræði, og fjallaði um möguleg tækifæri í Kreppunni. Nokkur bjartsýni einkenndi mál Gylfa en hæfni hans og þekking hefur verið notuð ríkulega af fjölmiðlum síðasta kastið við að veita landsmönnum sýn á það sem er að gerast í efnahagskerfi þjóðarinnar. Gylfi talaði umbúðalausa og kjarnyrta íslensku sem hann skreytti með fágætri kímni og var með læknisfræðifléttaða greiningu á íslensku krónunni til að mæta undirtóninum í erindi geðlæknisins Engilberts. Gylfi sýndi graf sem hann kallaði hjartalínurit krónunnar sem endaði með síðustu hjartaslögunum við upphaf kreppunnar.
Gylfi sagði að opinberar stofnanir hefðu brugðist eftirlitshlutverki sinu og ekki gætt hagsmuna almennings í þeim uppgangi sem varð hér á landi síðustu árin. Á sama tíma lánuðu viðskiptabankarnir án þess að hafa varkárnissjónarmið að leiðarljósi auk þess að skuldsetja sig um of. Nánar er fjallað um erindi Gylfa Zoega í sérfrétt: http://www.hi.is/is/frettir/opinberar_stofnanir_brugdust_eftirlitshlutve...

Gylfi Magnússon, dósent í hagfræði, fjallaði svo um kosti Íslendinga í myntmálum og rakti afar sveiflukennda gengissögu íslensku krónunnar. Óhætt er að fullyrða að allir sem sátu í Hringstofu í dag séu margs vísari um kosti þess og galla að taka upp Evru í framhaldi af erindi Gylfa.

Jóhann Ingi Gunnarsson sálfræðingur og íþróttaþjálfari, flutti hvatningartölu og sagði að seigla Íslendinga væri afgerandi einkenni þjóðarinnar. Hún væri vopn til að komast úr núverandi stöðu. Hann líkti áfalli Íslendinga við það að þjóðin hefði komið úr keppnisför í útlöndum með skottið á milli lappanna eftir skelfilega ósigra. Hann vísaði til þess að menn gætu heimfært margt úr heimi sportsins yfir í aðra hluta mannlífsins, þar sem margt snérist um sigra og ósigra. Menn þyrftu nauðsynlega að læra að taka hvoru tveggja.

Erindi Jóhanns var mjög fróðlegt og gaf hlustendum nýja sýn á vandamál líðandi stundar og ekki síður vonir um farsælar lausnir.

Þá var komið að þriðja Gylfanum að taka til máls en Gylfi Dalmann dósent við HÍ og vinnumarkaðsfræðingur, flutti snjallt erindi um kreppuna á vinnumarkaði. Þar sýndi hann nokkur dæmi um það hvernig sveigjanleiki íslensks vinnumarkaðar gæti komið í veg fyrir langvinnt atvinnuleysi. Gylfi Dalmann kom sér beint að efninu og var rausnarlegur á kímni sem hann fléttaði listilega við þá miklu alvöru sem viðfangsefnið vissulega er. Gylfi Dalmann var bjartsýnn fyrir hönd Íslendinga og rímaði þannig í skoðunum við aðra Gylfa sem töluðu í dag.

Í lokin flutti Páll Matthíasson geðlæknir fáeinar staðreyndir um hamingjuna. Engilbert stallbróðir hans, sem stýrði ráðstefnunni í dag af mikilli röggsemi, sagði í hálfkæringi að erindi Páls hefði engrar athygli notið, fyrr en eftir bankahrunið að menn virtust hafa farið að gefa gaum að öðrum gildum en þeim sem tengjast peningum.
Það var mál flestra sem sóttu Mannlíf og kreppur í dag að fyrirlestur Páls hefði verið frábær lokahnykkur á vel heppnaðri dagskrá. Það var samhljómur og bjartsýni í lófatakinu sem fyrirlesarar fengu í lokin.

Helstu styrktaraðilar verkefnisins eru Alcan á Íslandi, Brim, Frumtök og Össur. Actavis styrkir einnig fyrirlestra um heilsutengd málefni. Þessir aðilar áttu fulltrúa meðal hlustenda í dag.