Viðfangsefni mannfræðinnar eru fjölbreytt, í rauninni allt sem viðkemur tegundinni Homo sapiens fyrr og síðar. Spurningar mannfræðinga snúast þó einkum um hin mörgu og ólíku samfélög manna, hvað þau eigi sameiginlegt og hvað greini þau að.

Áhersla er lögð á að skilja hugmyndir og athafnir fólks og hvaða merkingu þær hafa fyrir það og aðra. Mannfræðin leitast einnig við að svara því hvar og hvenær tegundin varð til, hvernig þróun hennar var háttað og hvað skilji á milli mannsins og annarra tegunda. Að baki þekkingarleit mannfræðinga liggur knýjandi forvitni um það hver við erum, hvað við gerum og hvaðan við komum.

Þau gögn sem mannfræðingar styðjast við í rannsóknum sínum eru fjölbreytileg: viðtalsgögn, ljósmyndir, vídeóupptökur, minniskompur af vettvangi, söguleg gögn, tölulegar heimildir og upplýsingar um líkamsgerð, m.a. erfðasýni og mannabein. En hvert sem rannsóknarviðfangsefnið er –  erfðasaga þjóða, trúarbrögð, hugmyndir um kynþætti og þjóðerni, áhrif loftslagsbreytinga, fjölmenningarlegt samfélag, listsköpun, heilsa eða þróun – einkennist nálgun mannfræðingsins yfirleitt af nálægð við það fólk sem er til umfjöllunar hverju sinni. Oft er um að ræða beina tímabundna þátttöku í lífi annarra, svokallaðar vettvangsrannsóknir. Íslenskir mannfræðingar hafa stundað slíkar rannsóknir í fjölda landa, t.d. Kanada, Grænlandi, Bandaríkjunum, Níger, Gíneu-Bissá, Namibíu, Japan, Chile, Grænhöfðaeyjum, Spáni, Danmörku, Taílandi, Papúa Nýju Gíneu, Bretlandi, Þýskalandi og Íslandi.

Námið
Í mannfræði eru í boði fjórar námsleiðir á meistarastigi:

• MA-nám í mannfræði (120e)
• MA-nám: Með áherslu á margbreytileika (120e)
• MA-nám: Með áherslu á efnismenningu (120e)
• Heilsa, líkami og menning (30e) diplómanám
• Doktorsnám í mannfræði (210e)

Öll námskeiðin í mannfræði eru kennd í fjarnámi.

• Upplýsingar um fjarnám í mannfræði
  

Einnig er reglulega boðið upp á námskeið kennd af stundakennurum til að auka enn frekar á fjölbreytni námsins. Þau tengjast oft málefnum sem eru ofarlega á baugi í samfélaginu.

Kynningarbæklingur um mannfræði

Atvinnumöguleikar
Nám í mannfræði kemur að góðum notum þar sem þörf er á haldgóðum skilningi á menningarlegri fjölbreytni, eðli og merkingu mannlegra samskipta og athafna, og líffræðilegum sérkennum og samkennum tegundarinnar. Mannfræðingar starfa m.a. við fjölmiðlun, minjasöfn, innflytjendamál, kennslu, þróunarsamvinnu, friðargæslu og erfðarannsóknir.

Hafa samband
Vinsamlega sendið öll erindi og fyrirspurnir til Höllu Maríu Halldórsdóttur, verkefnisstjóra (hmh@hi.is)

• Eyðublað vegna nemendaerinda (.docx)

Umsjón náms
Heilsa, líkami og menning (30e) diplómanám: Gísli Pálsson, prófessor, Jónína Einarsdóttir, prófessor og Kristín Harðardóttir, aðjúnkt.