Almenn bókmenntafræði er kennd sem aðalgrein til 180 og 120 eininga og sem aukagrein til 60 eininga, og einnig til 120 eininga meistaraprófs og til doktorsprófs. Í greininni er veitt yfirlit um þróun bókmennta á Vesturlöndum og að nokkru leyti í öðrum heimshlutum. Nemendur fá þjálfun í að beita fræðilegum aðferðum og hugtökum á margvíslegan skáldskap, menningu og táknheim ólíkra tíma og svæða. Kennslan tekur mið af íslensku jafnt sem alþjóðlegu menningarsamhengi. Grunnnám í almennri bókmenntafræði skilar sér í víðtækri, fjölþjóðlegri menntun sem kemur sér vel í ýmsum störfum í samfélaginu og er jafnframt sterkur grunnur undir framhaldsnám.

Almenn málvísindi eru kennd sem aðalgrein til 180 og 120 eininga og sem aukagrein til 60 eininga, og einnig til 120 eininga meistaraprófs. Í greininni er fjallað um eðli mannlegs máls og sérkenni einstakra tungumála. Nám í almennum málvísindum er æskileg undirstaða fyrir þá sem vilja leggja fyrir sig rannsóknir og fræðastörf á sviði málvísinda, t.d. við háskólastofnanir. Undirstöðumenntun í almennum málvísindum getur nýst mjög vel í ýmsu öðru háskólanámi, bæði grunnnámi og framhaldsnámi, t.d. í talmeinafræði auk þess sem hún getur komið sér vel í margs konar störfum.

Íslenska er kennd sem aðalgrein til 180 og 120 eininga og sem aukagrein til 60 eininga, og einnig til 120 eininga meistaraprófs og til doktorsprófs. Nám í íslensku veitir haldgóða undirstöðuþjálfun í bókmenntum og málfræði og hentar vel sem undirbúningur undir margs konar störf. Fólk með háskólamenntun í íslensku fæst við kennslu á öllum skólastigum og við fræðistörf, m.a. á rannsóknastofnunum á sviði íslenskra fræða. Margir leggja fyrir sig ritstörf eða önnur störf á sviði menningar og lista, fjölmiðlun af ýmsu tagi og útgáfu- og kynningarstörf (sem fréttamenn, blaðamenn, ritstjórar, málfarsráðgjafar, textasmiðir, bókmenntarýnar o.s.frv.).

Íslenska sem annað mál er kennd sem aðalgrein til 180 og 120 eininga og sem aukagrein til 60 eininga, auk þess sem boðið er upp á 60 eininga diplómanám á BA-stigi. Annars vegar er um að ræða almennt fræðilegt nám um íslenska tungu, bókmenntir og sögu Íslands og hins vegar tungumálanám þar sem nemendur fá kennslu og þjálfun í að skrifa, tala og skilja nútímaíslensku. BA-námið er einkum ætlað þeim sem hafa fræðilegan áhuga á íslensku máli jafnhliða þjálfun í færniþáttum málsins, en diplómanámið er ætlað þeim sem vilja fyrst og fremst auka færni sína í íslensku til að geta tekist á við annað nám eða störf í íslensku samfélagi. Þessi námsleið, eða einstök námskeið úr henni, er einnig hentug fyrir skiptistúdenta úr öðrum námsgreinum.

Hagnýt ritstjórn og útgáfufræði er 90 eininga meistaranám, einkum ætlað nemendum sem lokið hafa BA-prófi með fyrstu einkunn í hugvísindum eða skyldum greinum. Með náminu er nemendum gefinn kostur á að búa sig á skipulegan hátt undir ritstjórnar- og útgáfustörf, t.d. hjá fjölmiðlum, bókaútgáfum og fræðastofnunum. Áhersla er lögð á hvort tveggja, þverfaglega samvinnu og tengsl við atvinnulífið svo að nemendur fái víða sýn yfir viðfangsefnið og öðlist reynslu sem geri þeim kleift að vinna sjálfstætt að ritstjórn og útgáfum. Lokaverkefni er ritstjórnar- eða útgáfuverkefni unnið í samvinnu við tiltekið fyrirtæki eða hjá því, t.d. hjá fjölmiðli, bókaútgáfu eða fræðastofnun.

Kvikmyndafræði er kennd sem aðalgrein til 120 eininga og sem aukagrein til 60 eininga. Námsefni greinarinnar skiptist, auk tveggja skyldunámskeiða (kvikmyndafræði og kvikmyndasögu), í nokkur áherslusvið: námskeið um kvikmyndir þjóðlanda (t.d. franskar eða japanskar kvikmyndir), um kvikmyndagreinar (t.d. hrollvekjur eða vestra) og um kvikmyndahöfunda (t.d. Hitchcock eða Bergman). Jafnframt er sérstök áhersla lögð á vensl kvikmynda og bókmennta, og námskeið sem snúa að afmörkuðum viðfangsefnum eða sviðum kvikmyndafræðanna (svo sem sálgreiningu og kvikmyndum, eða táknfræði og kvikmyndum).

Listfræði er kennd sem aðalgrein til 120 eininga og sem aukagrein til 60 eininga. Námið er samstarfsverkefni Háskóla Íslands og myndlistardeildar Listaháskóla Íslands. Listfræði veitir þekkingu í sögu listarinnar og þjálfun í að greina myndlistarverk, lesa myndir og túlka í margs konar samhengi. Listfræði fæst við myndlistargreinar í fortíð og nútíð (þ.e. málaralist, höggmyndalist/þrívíða list, grafík og í seinni tíð einnig fjöltækni, svo sem gjörninga, hljóð- og rafræna miðla), einnig byggingarlist, hönnun og sjónmenningu í víðara samhengi (s.s. kvikmyndir, auglýsingar og ljósmyndir).

Máltækni er 120 eininga meistaranám í samvinnu við tölvunarfræðideild Háskólans í Reykjavík og er hægt að taka tölvunarfræðinámskeið þar eða við Iðnaðarverkfræði-, vélaverkfræði- og tölvunarfræðideild Háskóla Íslands. Sérhæfð máltækninámskeið er einnig hægt að taka við Háskólann í Reykjavík eða erlenda háskóla. Markmið námsins er að veita nemendum vísindalega þjálfun og búa þá m.a. undir störf á sviði máltækni, vísindastörf af ýmsu tagi og doktorsnám ef því er að skipta.

Menningarfræði er 90 eininga meistaranám í samvinnu við Háskólann á Bifröst og útskrifast nemendur með sameiginlega gráðu frá báðum skólum. Námið er skipulagt þannig að hægt sé að ljúka fullu 90 eininga námi ásamt ritgerð á einu ári. Í menningarfræði er helstu kenningum samtímans á sviði hug- og félagsvísinda stillt saman í tilraun til að byggja upp sjálfstæða og gagnrýna hugsun um samfélag og menningu. Námið er sérstaklega ætlað nemendum með traustan bakgrunn á sviði hug- eða félagsvísinda sem hyggjast annaðhvort búa sig betur undir frekara nám á sínu sérsviði eða efla fræðilega þekkingu sína og kunnáttu til að geta betur tekist á við krefjandi störf í samfélaginu.

Ritlist er kennd til 120 eininga á meistarastigi. Í ritlist gefst áhugafólki um ritsmíðar færi á að þroska hæfileika sína undir handleiðslu reyndra höfunda. Lögð er áhersla á frjóa hugsun og miðlun hennar í listrænum texta af ýmsu tagi. Meðfram eru lesnar bókmenntir hvaðanæva úr heiminum. Markmiðið með ritlistarnámi á MA-stigi er að búa til rithöfundasmiðju þar sem efnilegir höfundar fá tækifæri og aðstöðu til að þroska hæfileika sína undir stjórn reyndra rithöfunda. Þar gefst þeim kostur á að skrifa jafnt og þétt og verður leiðbeint um hvaðeina sem lýtur að listrænum ritsmíðum, s.s. vinnulag, efnistök, byggingu, mál og stíl, prófarkalestur, frágang, ritstjórn og útgáfu. Námið er að miklu leyti verklegt, og fer þá fram í smiðjum eða rithringjum, en líka að hluta til fræðilegt.

Táknmálsfræði er kennd sem 120 eininga aðalgrein og 60 eininga aukagrein en auk þess er unnt að taka 60 einingar í táknmálstúlkun sem fræðilegu og hagnýtu viðfangsefni. Þeir stúdentar sem ljúka því námi eru táknmálstúlkar. Í táknmálsfræði er leitast við að kenna nemendum færni í íslensku táknmáli, fjallað er um menningarheim heyrnarlausra og um íslenska táknmálið frá fræðilegu sjónarhorni. Markmiðið með táknmálsfræðum er annars vegar að búa nemendur undir rannsóknir á táknmáli og stöðu heyrnarlausra og heyrnarskertra og hins vegar að renna fræðilegum stoðum undir starf táknmálstúlka.

Talmeinafræði er þverfræðilegt 120 eininga meistaranám sem Íslensku- og menningardeild stendur að ásamt Menntavísindasviði, Sálfræðideild og Læknadeild. Námið er vistað í síðasttöldu deildinni og nemendur brautskrást þaðan. 15 nemendur verða teknir inn í námið annað hvert ár. Nemendur geta haft fjölbreyttan undirbúning en verða að hafa lokið tilteknum námskeiðum í íslensku, almennum málvísindum og sálfræði. Námið miðar að því að veita vísindalega menntun og þjálfun í talmeinafræði og búa nemendur undir störf talmeinafræðinga og vísindastörf sem tengjast greininni.

Þýðingafræði er kennd sem 60 eininga aukagrein á BA-stigi. Á meistarastigi er boðið upp á 120 eininga námsleiðir í þýðingafræði, nytjaþýðingum og ráðstefnutúlkun, og 60 eininga hagnýtt diplómanám bæði í þýðingum og ráðstefnutúlkun. Deild erlendra tungumála stendur einnig að þessu námi. Greinin undirbýr nemendur í miðlun upplýsinga milli menningarheima og eru viðfangsefnin af margvíslegu tagi. Nemendur læra að meta upplýsingar og vinna með þær með það fyrir augum að færa þær á milli menningarheima eða kerfa. Þýðinga- og túlkanám er góður grunnur fyrir þá sem starfa við alþjóðasamskipti, miðlun upplýsinga, útgáfu eða annað þvíumlíkt.

Síða uppfærð / breytt 6. apríl 2010