Skip to main content

Sálfræðiráðgjöf háskólanema

Sálfræðiráðgjöf háskólanema er þjálfunarstöð í klínískri sálfræði og er starfrækt á vegum Sálfræðideildar Háskólans.

Sálfræðiráðgjöfin hefur tvíþætt markmið; að þjálfa framhaldsnema í sálfræði í að sinna klínískum störfum og að veita skjólstæðingum sálfræðiþjónustu, þ.e. háskólanemum og börnum þeirra. Sálfræðinemar á cand. psych. stigi veita ráðgjöfina undir faglegri handleiðslu löggiltra sálfræðinga. 

Forstöðumaður Sálfræðiráðgjafar háskólanema er Gunnar Hrafn Birgisson, PsyD, sérfræðingur í klínískri sálfræði.

Þeim sem leita til Sálfræðiráðgjafarainnar er m.a. veitt aðstoð við:

  • að ná markmiðum sínum
  • að leysa úr sálrænum vanda
  • að breyta hegðun, hugarfari og/eða lífsstíl
  • að bæta samskipti sín við annað fólk
  • vinna að því sem stuðlar að góðri heilsu, bættri líðan og heilbrigði 

Stuðst er við gagnreyndar aðferðir hugrænnar atferlismeðferðar og aðrar aðferðir sem rannsóknir sýna að beri árangur, s.s. efling núvitundar.

Sem þjálfunarstöð fyrir sálfræðinema er Sálfræðiráðgjöfin ekki ætluð til þess að fást við alvarlegustu sálmeinin eins og langvinna geðsjúkdóma, eiturlyfjafíkn, eða önnur djúpstæð sálmein sem tilheyra frekar geðdeildum eða öðrum meðferðarstofnunum.

Sálfræðiráðgjöfin annar takmörkuðum fjölda mála á hverjum vetri og miðast fjöldi mála við námskröfur sem gerðar eru til cand. psych. nemendanna. Það er því miður ekki víst að allir þeir háskólanemar sem óska eftir þjónustu geti fengið hana.

Fyrir fullorðna er veitt greining og skammtíma samtalsmeðferð auk annars konar ráðgjafar við sálrænum vanda. Fyrir börn og unglinga háskólanema er veitt greining og samtalsmeðferð ásamt ráðgjöf fyrir foreldra, t.d. ráðgjöf við vanda er snertir erfiðar tilfinningar og hegðunarvandkvæði barna. Einnig er veitt foreldraráðgjöf um þroskavanda barna og uppeldi þeirra.