Viltu vinna tvær milljónir?
Leit er hafin innan Háskóla Íslands að hagnýtanlegum hugmyndum frá starfsmönnum eða nemendum fyrir Hagnýtingarverðlaun Háskóla Íslands sem verða veitt í 18. sinn þann 17. nóvember næstkomandi. Verðlaunafé nemur samtals 3,5 milljónum króna.
Starfsmenn og nemendur af öllum fræðasviðum skólans og tengdum stofnunum eru hvattir til að taka þátt í samkeppninni enda sýnir reynslan að hagnýta má fleira en tæknilegar lausnir í iðnaði.
Peningaverðlaun eru veitt fyrir þrjú efstu sætin í keppninni. Tvær milljónir króna koma í hlut verkefnisins sem verður í fyrsta sæti, verkefnið í öðru sæti fær eina milljón króna og 500 þúsund krónur eru veittar fyrir verkefnið sem hafnar í þriðja sæti.
Frestur til að skila inn tillögum í samkeppnina rennur út 27. október nk.
Sérstök dómnefnd metur hugmyndir sem berast í keppnina en við valið skoðar hún m.a.:
i) Leiðir við hagnýtingu og hversu fljótt er unnt að hagnýta uppfinningu
ii) Hvort hagnýting styðji við stefnu og starfsemi Háskóla Íslands
iii) Rannsóknavinnu að baki verkefni/hugmynd
iv) Nýnæmi og frumleika
v) Ávinning fyrir samfélagið
vi) Hvernig verðlaunafé mun nýtast við hagnýtingu verkefnis/hugmyndar
Þeim sem hafa áhuga á að vera með í samkeppninni býðst að taka þátt í vinnustofu um hagnýtingu hugmynda í akademísku umhverfi mánudaginn 10. október kl. 16-18. Vinnustofan er þátttakendum að kostnaðarlausu en skráning fer fram í gegnum netfangið gydae@hi.is fyrir lok dags 5. október.
Á heimasíðu verðlaunanna má enn fremur finna ýmsar upplýsingar um Hagnýtingarverðlaun skólans, þar á meðal verklagsreglur um samkeppnina, yfirlit yfir fyrri verðlaunahafa og umsóknareyðublað.
Tillögum má skila rafrænt á póstfangið gydae@hi.is eða skriflega til umsjónarmanns samkeppninnar, Gyðu Einarsdóttur, vísinda- og nýsköpunarsviði Háskóla Íslands (s. 525-5488). Gyða aðstoðar jafnframt umsækjendur og veitir nánari upplýsingar.
Samkeppnin um Hagnýtingarverðlaun Háskóla Íslands er samstarfsverkefni háskólans, Árnason|Faktor og Nýsköpunarmiðstöðvar Íslands.