Sjálfstæðishetjan Jón Sigurðsson og þjóðríkið var viðfangsefnið á málþingi sem fram fór í Hátíðasal Háskóla Íslands síðastliðinn föstudag, 27. maí. Upptaka af málþinginu er nú aðgengileg á myndbandavef háskólans.
Málþingið bar yfirskriftina „Þjóðhetjan og þjóðríkið“ og var haldið í tilefni 200 ára afmælis Jóns Sigurðssonar. Að málþinginu stóðu Háskóli Íslands, Sagnfræðistofnun og Afmælisnefnd Jóns Sigurðssonar. Fimm fræðimenn á sviði sagnfræði, lögfræði og bókmennta veltu fyrir sér Jóni Sigurðssyni frá ólíkum sjónarhornum, meðal annars hvort hann hafi verið þjóðhetja og hvernig hann lagði grunninn að lagalegum röksemdum Íslands fyrir kröfunni um sjálfstæði.
Upptaka af málþinginu er í tveimur hlutum og hana má nálgast á myndbandavef Háskóla Íslands.
Dagskrá málþingsins:
1. Setning Ásta R. Jóhannesdóttir, forseti Alþingis.
2. „Var Jón Sigurðsson sjálfstæðishetja?“ Guðmundur Hálfdanarson, prófessor í sagnfræði við Háskóla Íslands
3. „Kvenhetja eða þjóðhetja?“ Erla Hulda Halldórsdóttir, sagnfræðingur og doktorsnemi við Háskóla Íslands
4. „Hver fær að blása á kertin? Í tilefni af 200 ára afmæli H. C. Andersen.“ Jón Karl Helgason, dósent í íslensku við Háskóla Íslands
5. „Þjóðréttarfræðingurinn Jón Sigurðsson.“ Björg Thorarensen, prófessor í lögfræði við Háskóla Íslands
6. „Faðir, frelsari, forseti. Jón Sigurðsson sem sameiningartákn 1879–2011.“ Páll Björnsson, sagnfræðingur og dósent í nútímafræði við Háskólann á Akureyri
