Tíu milljónir króna til brjóstakrabbameinsrannsókna
Styrktarfélagið Göngum saman veitti 10 milljónir króna í rannsóknarstyrki til vísindamanna við Háskóla Íslands og Landspítala sem eiga það sameiginlegt að stunda grunnrannsóknirá brjóstakrabbameini. Með þessari styrkveitingu hefur Göngum saman úthlutað alls rúmum 60 milljónum króna til grunnrannsókna á brjóstakrabbameini frá stofnun félagsins árið 2007.
Styrkjunum var úthlutað miðvikudaginn 7. október. Fimm aðilar fengu styrk að þessu sinni:
• Birna Þorvaldsdóttir, doktorsnemi við Háskóla Íslands, hlaut þriggja milljóna króna styrk fyrir verkefnið Telomerar og brjóstakrabbamein
• Edda Sigríður Freysteinsdóttir, náttúrufræðingur á Landspítala, hlaut 1,4 milljóna króna styrk fyrir verkefnið Ættlægt brjóstakrabbamein og möguleg áhættugen
• Erika Morera, doktorsnemi við Háskóla Íslands, hlaut einnar milljónar króna í styrk fyrir verkefnið Samanburður á eðlilegri og illkynja bandvefsumbreytingu stofnfruma úr brjóstkirtli.
• Guðrún Valdimarsdóttir, lektor við Læknadeild Háskóla Íslands, hlaut tveggja milljóna króna styrk fyrir verkefnið Þyrnirósarsvefn brjóstaæxlisfruma.
• Katrín Birna Pétursdóttir, meistaranemi við Háskóla Íslands, hlaut 2,6 milljónir króna í styrk fyrir verkefnið Breytingar á genatjáningu í lyfjaónæmum brjóstastofnfrumulínum í tengslum við stofnfrumueiginleika og aldehyde dehydrogenasa virkni (ALDH).
Um Göngum saman
Styrktarsjóður Göngum saman styrkir grunnrannsóknir á brjóstakrabbameini. Styrkveitingin í ár byggist að mestu leyti á frjálsum framlögum einstaklinga sem hafa lagt hafa sitt af mörkum með þátttöku í styrktargöngu félagsins á Mæðradaginn, Reykjavíkurmaraþoninu og kaupum á söluvarningi félagsins. Einnig hafa ýmis félagasamtök, fyrirtæki og einstaklingar lagt Göngum saman lið en megináhersla er á að öll framlög renni óskipt í styrktarsjóð félagsins. Frá stofnun félagsins hefur ríflega 60 milljónum verið úthlutað til íslenskra rannsóknaraðila sem sinna brjóstakrabbameinsrannsóknum.
Nánari upplýsingar um félagið er að finna á www.gongumsaman.is
