Félagsvísindasvið og námsbraut í safnafræði við Háskóla Íslands efna til fyrirlestraraðar um framtíðarsýn safnstjóra höfuðsafna landsins. Fyrirlestraröðin er haldin í tilefni af aldarafmæli Háskóla Íslands og fyrsti fyrirlesturinn er á morgun, föstudaginn 28. október kl. 16 í Hátíðasal Háskóla Íslands.
Höfuðsöfn Íslands eru þrjú talsins: Listasafn Íslands, Þjóðminjasafn Íslands og Náttúruminjasafn Íslands. „Hlutverk þeirra eru skilgreind í sérstökum lögum um tilgang og starfsemi þeirra, en þau eiga að sinna víðtækum samfélagslegum tilgangi, hvert á sínu sviði, sem og að vera faglegur stuðningur við önnur söfn og safntengda starfsemi í landinu,“ segir Sigurjón B. Hafsteinsson, lektor við Félags- og mannvísindadeild á afmælisvef skólans. Hann segir söfnin gegna mikilvægum hlutverkum og því hafi verið kjörið að efna til fyrirlestrarraðarinnar.
Safnstjórar safnna þriggja munu í erindum sínum horfa fram til ársins 2050 og velta fyrir sér hvað komi til með að breytast á söfnunum þangað til. Dr. Halldór Björn Runólfsson, safnstjóri Listasafns Íslands, ríður á vaðið á morgun og kynnir sýn sína. „Upphaflega átti ártalið að vera 2063, en árið 1863 var fyrsta formlega safnið stofnað á Íslandi, Forngripasafnið sem síðar varð Þjóðminjasafn Íslands. Það sem einkenndi það safn var að forsvarsmenn þeirra vildu stemma stigu við útflutningi menningarverðmæta og gera Íslendinga sjálfa meðvitaða um gildi þess að hafa tækifæri til að sjá hluti á borð við menningaminjar og listgripi með eigin augum, en ekki eingöngu að heyra sögur af þeim.
Fljótlega fylgdi í kjölfarið vilji til þess að stofnað yrði náttúrugripasafn með sömu formerkjum og var það gert áður en 19. öldin leið undir lok. Eftir vandlega yfirlegu var ákveðið að rúnna töluna af og varða leiðina við 2050 þar sem hún er hæfilega fjarlæg til að geta gefið ímyndunaraflinu lausan taumin en um leið það nálægt að meginþorri þeirra sem stunda nú nám við Háskóla Íslands munu lifa til að geta metið framtíðarsýnina,“ segir Sigurjón.
Annan fyrirlesturinn í röðinni, ,,Þjóðminjasafn Íslands árið 2050“, flytur Margrét Hallgrímsdóttir þjóðminjavörður 4. nóvember kl. 16 í Hátíðsal.
Þriðja og síðasta fyrirlesturinn, „Náttúruminjasafn Íslands árið 2050“, flytur svo dr. Helgi Torfason, safnstjóri Náttúruminjasafns Íslands, 18. nóvember kl. 16 í Hátíðasal.
Ítarlegt viðtal við Sigurjón um fyrirlestrarröðina og námsbraut í safnafræði við Félags- og mannvísindadeild er að finna á aldarafmælisvef Háskóla Íslands.
