Ný námskeið á Icelandic Online
Þann 7. septemkber nk. verða þrjú ný námskeið á vefnum Icelandic Online, sjálfstýrðu vefnámskeiði, formlega opnuð. Þetta eru námskeið fyrir byrjendur og tvö framhaldsnámskeið.
Icelandic Online er sjálfstýrt vefnámskeið í íslensku sem öðru máli. Fyrsti hluti þess var formlega tekin í notkun árið 2004. Annað námskeiðið var tilbúið 2005. Icelandic Online hefur verið öllum opið án endurgjalds. Um 16.000 manns eru nú skráðir sem notendur og 600 heimsækja námskeiðin á degi hverjum.
Nýju námskeiðin eru unnin í samvinnu Hugvísindastofnunar Háskóla Íslands, Stofnunar Árna Magnússonar í íslenskum fræðum, Stofnunar Vigdísar Finnbogadóttur, Fjölmenningarseturs, Fjölmenningar ehf. og fimm háskólastofnana annars staðar á Norðurlöndum. Háskólinn í Wisconsin í Bandaríkjunum veitir aðgang að rafrænni íslensk-enskri orðabók, sem unnin var í sambandi við fyrsta hluta verkefnisins.
Námskeiðin eru bæði ætluð háskólanemum og öðrum sem áhuga hafa á að læra íslensku hér á landi og erlendis.
Norræna tungumálaáætlunin, Nordplus sprog, Háskóli Íslands og Stofnun Árna Magnússonar í íslenskum fræðum hafa styrkt gerð nýju námskeiðanna þriggja.
Fjallað var um þessi tímamót í viðtali við Birnu Arnbjörnsdóttur (pdf), prófessor og verkefnastjóra vefsins, í Fréttablaðinu 28. ágúst 2010.
3.9.2010 14:01
