Ný bók á sviði fjármunaréttar
Nýverið kom út bókin Restatement of Nordic Contract Law á vegum Djøf-forlagsins í Kaupmannahöfn. Bókin er afrakstur nokkurra ára rannsóknar norræna fræðimanna á sviði fjármunaréttar. Markmið hennar var að kanna beitingu og túlkun dómstóla á reglum norræns fjármunaréttar, einkum á sviði kröfu- og samningaréttar.
Um langt skeið hefur verið leitast við á Norðurlöndum að hafa í gildi sambærilegar reglur á sviði fjármunaréttar. Má sem dæmi nefna að gildandi samningalög norrænu þjóðanna eru nær samhljóða. Þau voru sett fyrir um einni öld að undangengnu afar víðtæku samstarfi Norðurlandaþjóðanna, þar á meðal fræðimanna á sviði fjármunaréttar.
Bókin er á ensku og í henni er leitast við draga með skýrum hætti saman gildandi reglur og meginsjónarmið norræns kröfu- og samningaréttar, einkum með hliðsjón af niðurstöðum dómstóla. Sýnast dómstólar Norðurlandaþjóðanna hafa túlkað og skýrt gildandi efnisreglur á þessu sviði með afar áþekkum hætti þótt langur tími sé liðinn frá setningu sumra reglnanna.
Fræðimenn frá lagadeildum 13 háskóla á Norðurlöndum komu að útgáfu bókarinnar, með mismiklum hætti. Af hálfu Háskóla Íslands sat Ása Ólafsdóttir dósent í ritnefnd bókarinnar ásamt Ole Lando, Marie-Louise Holle og Peter Møgelvang-Hansen frá Viðskiptaháskólanum í Kaupmannahöfn (CBS), Torgny Håstad og Laila Zackariasson frá Háskólanum í Uppsala, Berte-Elen Konow frá Háskólanum í Bergen og Soli Nystén-Haarala frá Háskólanum í Lapplandi.
Aðrir sem komu að rannsókninni og voru jafnframt meðhöfundar einstakra kafla vegna íslensks réttar voru, auk Ásu Ólafsdóttur, þeir Eiríkur Jónsson og Eyvindur G. Gunnarsson, prófessorar við Háskóla Íslands.
