Bókin Nútímans konur. Menntun kvenna og mótun kyngervis á Íslandi 1850-1903 eftir Erlu Huldu Halldórsdóttur var nýverið tilnefnd til Fjöruverðlaunanna, bókmenntaverðlauna kvenna, í flokki fræðirita. Bókin er doktorsverkefni Erlu Huldu í sagnfræði við Háskóla Íslands en Erla Hulda varði doktorsritgerð sína við skólann fyrr á árinu. Bókin er gefin út af Rannsóknastofu í kvenna- og kynjafræði, Sagnfræðistofnun og Háskólaútgáfunni.
Umsögn dómnefndar um Nútímans konur hljóðar svo:
„Nútímans konur: Menntun kvenna og mótun kyngervis á Íslandi 1850-1903 eftir Erlu Huldu Halldórsdótturfjallar um mikilvægt tímabil í mótun íslenskrar þjóðarímyndar. Í bókinni er teflt saman rannsókn á kvennaskólum þegar þeir voru að koma til sögunnar og einkabréfum kvenna sem endurspegla væntingar þeirra á þessum umrótatímum. Bókin dregur fram þátt kenna í mótun nútímasamfélags og ólíkar sýnir á hlutverki og stöðu kvenna í því samfélagi. Höfundur dregur saman aðferðafræði og þróun kenninga í kvennasögufræðum á greinargóðan hátt í inngangi og er sá kafli mikilvægt innlegg í spennandi grein sagnfræðinnar. Nútímans konur er lipurleg skrifuð og bókin er aðgengileg bæði fræðafólki og almenningi.“
Aðrar tilnefningar til Fjöruverðlaunanna má nálgast hér.
