Nemendur HI í þroskunar- og sameindalíffræði skara fram úr í Evrópu
Framhaldsnemar HÍ í lífvísindum ná einstökum árangri í Evrópu
Rannsaka tímasetningu atburða í fósturþroska og staðsetningu erfðaupplýsinga í frumum
Tveir framhaldsnemar í lífvísindum við HÍ, Marteinn Þór Snæbjörnsson og Sara Sigurbjörnsdóttir náðu þeim einstæða árangri að komast inn í eitt besta framhaldsnám í sameindalíffræði í Evrópu við EMBL í Heidelberg. EMBL (European Molecular Biology Laboratory) er öflugasta rannsóknastofnun Evrópu á sviði sameindalíffræði og skyldra greina en Ísland tekur þátt í rekstri hennar.
Við EMBL munu þau Marteinn og Sara leggja stund á rannsóknir á þroskunar- og sameindalíffræði við bestu mögulegar aðstæður. Um talsvert afrek er að ræða en á hverju ári sækja um 1000 einstaklingar um inngöngu í doktorsnámið hjá EMBL en aðeins um 50 komast inn á hverju ári (5%). Nú þegar er einn íslenskur nemi, Bjarki Jóhannesson, við nám hjá stofnuninni. Árangurinn endurspeglar sterka stöðu lífvísinda hér á landi.
Marteinn Þór Snæbjörnsson, fæddur 1981, er lífefnafræðingur með BS gráðu frá HÍ og er í MS námi við Læknadeild undir leiðsögn Dr. Péturs Henry Petersen. Verkefnið, sem er styrkt af Rannsóknasjóði Vísinda og tækniráðs og minningarsjóði Helgu og Sigurliða, er unnið á Rannsóknarstofu í Taugalíffræði og við Lífvísindasetur Læknagarðs. Verkefni hans fjallar um flutning efna til og frá æðum og til heilans. Doktorsverkefni hans við EMBL verður unnið á rannsóknarstofu Dr. Aulehla og snýst um hvernig mikilvægir atburðir í fósturþroskun eru tímasettir.
Þess má einnig geta að Marteinn hlaut einnig styrk frá DAAD (Deutscher Akademischer Austauschdienst) til að stunda nám í Þýskalandi.
Sara Sigurbjörnsdóttir, fædd 1984, er líffræðingur með BS gráðu frá HÍ og er í MS námi við Líf- og umhverfisvísindadeild undir leiðsögn Ólafs S. Andréssonar prófessors og Zophoníasar O. Jónssonar dósents. Rannsóknaverkefni hennar, stutt af Rannsóknasjóði H.Í., er unnið við Líffræðistofnun Háskólans og fjallar um lestur upplýsinga úr erfðaefni gersveppa en það getur skipt miklu máli í líftækni hversu vel og hratt upplýsingarnar í erfðaefninu eru nýttar við framleiðslu próteina, helstu byggingareiningu líkamans.
Doktorsverkefni Söru við EMBL verður unnið á rannsóknarstofu Dr. Leptin og fjallar um staðsetningu erfðaupplýsinga innan frumunnar og hvaða hlutverki það gegnir í myndun flókinna frumuforma í öndunarkerfi ávaxtaflugunnar.
25.4.2010 22:56
