Katrín Jakobsdóttir menntamálaráðherra heimsótti í dag Lífvísindasetur í Læknagarði en þar fara fram fjölbreyttar rannsóknir á sviði lífvísinda sem miða m.a. að því að rannsaka orsakir ýmissa sjúkdóma. Á sjötta tug vísindamanna starfa í Lífvísindasetrinu við rannsóknir á sviði erfða-, frumu og sameindalíffræði.
Vísindamenn setursins kljást við verkefni allt frá smæstu einingum frumunnar til rannsókna á samskiptum fruma og uppruna sjúkdóma. Stór hluti rannsókna setursins byggist á framlagi doktorsnema við Háskóla Íslands.
Katrín Jakobsdóttir fékk kynningu á starfsemi Lífvísindasetursins í Læknagarði dag. Þar er áherslan lögð á fjölbreytta og þverfræðilega nálgun til að svara spurningum um starfsemi og samstarf fruma og hvernig þetta fer úrskeiðis í sjúkdómum.
„Í Lífvísindasetri Læknagarðs leggjum við megináhersluna á samstarf rannsóknahópa og sameiginlega uppbyggingu tækja og aðstöðu. Það er ekki einungis besta leiðin til að bregðast við fjárhagslegum þrengingum heldur líka vænlegra til árangurs,“ sagði Eiríkur Steingrímsson prófessor í sameindalíffræði við Læknadeild HÍ. Hann var einn þeirra sem tók til máls í heimsókn menntamálaráðherra.
Allir rannsóknahópar setursins eiga það sameiginlegt að notast við erfða-, sameinda- og frumulíffræði til að skilja starfsemi lífvera og eðli sjúkdóma. Fram kom í kynningu fyrir ráðherra í dag að sameindalíffræðin væri undirgrein líffræðinnar sem fengist við rannsóknir á lífverum á sameindastigi.
Markmiðið væri að átta sig á grundvallarstarfsemi frumanna niður í smæstu ferla, hvernig ákvörðunum fruma væri stjórnað, hvernig frumurnar tali saman, hvernig þær komi saman til að mynda tiltekin líffæri og hvernig sjúkdómar verði til þegar þessi starfsemi bilar.
Guðrún Valdimarsdóttir, sem er sérfræðingur í lífefna- og sameindalíffræði við Lífvísindasetrið, sýndi menntamálaráðherra kvikmyndir af sláandi hjartafrumu og vakti sú sýning afar mikla athygli. Guðrún vinnur að rannsóknum á starfsemi og sérhæfingu stofnfruma úr fósturvísum. Hún vinnur að rannsóknum á þeim þáttum sem fá stofnfrumur til að sérhæfast í hjartavöðvafrumur.
Guðrún hefur sett upp vinnulíkan þar sem henni hefur tekist að útbúa hjartavöðvafrumur sem slá í tilraunaglasi eins og þeim er ætlað að gera í heilbrigðum hjartavöðva í mannslíkama.
Við kynninguna í dag kom fram að nokkur rannsóknateymi Lífvísindasetursins beini sjónum að sameindalíffræði krabbameins og partur vinnunnar hafi miðast við að þróa lyf í baráttunni við þennan vágest, m.a. til að lækna ákveðnar gerðir brjóstakrabbameins. Sú vinna hefur skilað verulegum árangri en Jórunn Eyfjörð og Helga Ögmundsdóttir, prófessorar við Læknadeild HÍ, fara fyrir þeim rannsóknum.
Undir lok heimsóknarinnar tók ráðherra þátt í spjalli um rannsóknir Lífvísindasetursins þar sem framtíðarmöguleikar þess voru ræddir. Mikill hugur er í vísindamönnum setursins þrátt fyrir væntanlegan niðurskurð og aukna samkeppni um fé til rannsókna.
