Lokaráðstefna Norrænu Velferðarvaktarinnar
Lokaráðstefna verkefnisins Norræna velferðarvaktin var haldin á Hilton Hotel Reykjavík 10. nóvember síðastliðin og var afar vel sótt af bæði innlendum og erlendum þátttakendum.
Á ráðstefnunni var afrakstur verkefnanna kynntur. Niðurstöður á rannsóknum um hvernig norræn velferðarkerfi eru undirbúin undir hvers konar vá, með áherslu á hlutverk félagsþjónustu, voru kynntar. Jafnframt var farið yfir viðamiklar rannsóknir á afleiðingum fjármálakreppa á Norðurlöndunum auk samanburðar við valin Evrópulönd sem glímt hafa við efnahagskreppur.
Á ráðstefnunni voru einnig kynntir nýir norrænir velferðarvísar sem eiga að auðvelda stjórnvöldum yfirsýn yfir samfélagsþróunina á hverjum tíma.
Lena Dominelli, prófessor við Durham University og vel þekktur sérfræðingur á sviði félagsráðgjafar, hélt fyrirlestur sem bar heitið „Making Invisible Gender Relations Visible: The welfare state in promoting environmental and social justice in (hu)man-made and natural disasters“.
Guðný Björk Eydal, prófessor í Félagsráðgjafardeild, kynnti niðurstöður verkefnisins „Velferð og vá“, en hún hefur leitt hóp 40 rannsakenda og sérfræðinga á Norðurlöndum sem hafa m.a. rannsakað hlutverk félagsþjónustu á tímum vár.
Siv Friðleifsdóttir, formaður Íslensku velferðarvaktarinnar, kynnti tvær tillögur sem eru hluti af afrakstri verkefnisins, The Nordic Welfare Indicators og A Nordic Welfare Forum.
Ráðstefnan var vel sótt en hægt er að nálgast upptökur af fyrirlestrum og umræðum ásamt glærum á heimasíðu verkefnisins.