Landsliðin í raungreinum á leið á Ólympíumót
Ólympíulandsliðin í þremur greinum raunvísinda hafa síðustu vikur búið sig undir þátttöku í Ólympíumótum með stífum æfingum í Háskóla Íslands. Þau heimsóttu skrifstofu rektors á dögunum.
Um er að ræða landsliðin í efnafræði, eðlisfræði og stærðfræði en liðin eru skipuð nemendum úr framhaldsskólum sem urðu í efstu sætum í landskeppnum í greinunum þremur sem fram fóru síðastliðinn vetur.
Landsliðið í stærðfræði skipa þau Atli Fannar Franklín, Álfheiður Edda Sigurðardóttir, Elvar Wang Atlason, Guðjón Helgi Auðunsson, Hannes Kristinn Árnason og Martha Guðrún Bjarnadóttir. Þau æfðu af kappi allan júnímánuð í Tæknigarði og Öskju undir leiðsögn bæði háskólakennara og -nema en í síðarnefnda hópnum voru allmargir fyrrverandi keppendur á Ólympíumótinu í stærðfræði. Hópurinn hélt svo til Danmerkur til framhaldsþjálfunar en er nú kominn til Hong Kong þar sem Ólympíumótið í stærðfræði fer fram dagana 6.-16. júlí. Dómnefndarfulltrúi Íslands á mótinu er Marteinn Harðarson og fararstjóri er Jóhanna Eggertsdóttir.
Ólympíuliðið í efnafræði tekur þátt í tveimur mótum að þessu sinni, Norrænu efnafræðikeppninni sem haldin er í Kaupmannahöfn 4.-9. júlí 2016 og Alþjóðlegu Ólympíukeppninni í efnafræði sem haldin verður í Tbilisi í Georgíu dagana 23. júlí-1. ágúst. Ólympíuliðið hefur nýtt sér aðstöðu í Háskóla Íslands til æfinga og undirbúnings en það er skipað þeim Arnari Jóhannssyni, Þorsteini Hálfdanarsyni, Kingu Soffíu Demény og Tómasi Arnari Guðmundssyni. Liðsstjóri er Katrín Lilja Sigurðardóttir, aðjunkt í efnafræði við Háskóla Íslands, en Már Björgvinsson, Andri Guðmundsson, Bjartur Máni Sigurðarson og Magnús Hlynur Haraldsson komu að þjálfun liðsins.
Ólympíuliðið í eðlisfræði hefur m.a. haft bækistöðvar sínar í stofu 112 í VR I þar sem stífar æfingar hafa staðið yfir en liðið hefur einnig nýtt aðstöðu í Háskólanum í Reykjavík. Liðið skipa þau Hjalti Þór Ísleifsson, Erla Sigríður Sigurðardóttir, Valtýr Kári Daníelsson, Ísak Valsson og Matthías Baldursson Harksen en þess má geta að sá síðastnefndi tók á dögunum við styrk úr Afreks- og hvatningarsjóði stúdenta Háskóla Íslands og hyggur á nám í stærðfræði og eðlisfræði í skólanum í haust. Liðið mun taka þátt í Ólympíumótinu í eðlisfræði í Zürich í Sviss dagana 11.-17. júlí. Þau Ingibjörg Haraldsdóttir og Pétur Rafn Bryde fara með liðinu til Sviss en Ari Ólafsson, dósent í eðlisfræði við Háskóla Íslands, og Viðar Ágútsson hafa einnig komið að þjálfun liðsins.
Háskóli Íslands óskar keppendunum öllum góðs gengis á Ólympíumótunum.