Laganemar taka þátt í Norrænu málflutningskeppninni
Lið laganema við Háskóla Íslands, Club Lögberg, tók þátt í Norrænu málflutningskeppninni á sviði mannréttinda sem fór fram í Helsinki 9.-12. júní. Þetta er 30. árið í röð sem lið frá Háskóla Íslands tekur þátt í keppninni. Í liði Club Lögberg eru Áslaug Björk Ingólfsdóttir, Iðunn Garðarsdóttir, Jenný Harðardóttir, Linda Ramdani, Sigurður Helgason og Sindri Rafn Kamban.
Dómarar í keppninni eru dómarar við Mannréttindadómstól Evrópu og hæstaréttardómarar frá Norðurlöndunum. Keppnin fer fram á sænsku, dönsku og norsku.
Club Lögberg gerði jafntefli við Club Södermark frá Stokkhólmi í málflutningskeppninni en laut í lægra haldi fyrir Club Munch Andersen frá Århus, sem komst í undanúrslit. Club Lögberg komst því ekki í undanúrslit í ár en liðið er þó ánægt með frammistöðuna.